BOBONARU, 23 Marsu 2026 (TATOLI) – Rai-halai danifika estrada ligasaun suku Saburai, postu administrativu Maliana, bá postu administrativu Lolotoe, munisípiu Bobonaru, hafoin akontese udan ho intensidade boot iha semana kotuk ne’e.
Komunidade Fernando Leite dehan situasaun ne’e prejudika movimentasaun komunidade atu viajen bá Atus no Sasa, suku Gildapil no Lebos.
“Ami-nia dalan liga Saburai bá Lolotoe ne kotu tiha ona, tanba udan-boot foin lalais ne’e. Husu ba Governu atu hadi’a lalais para ami bele la’o bámai fali ho di’ak, tanba agora motór ho karreta liu la di’ak, dada malu de’it. Ida-ne’e difikulta tebes ami atu lori produtu lokál bá merkadu no bá instalasaun saúde”, nia hateten ba Tatoli, ohin.
Xefe Suku Saburai, Abel Manu Mali, dehan iha tempu badak sei submete pedidu ba Autoridade Munisípiu Bobonaru hodi ekamiña ba ministériu kompetente atu halo normalizasaun ba estrada referida.
“Movimentu susar loos, satán agora udan la para ne’e bele aumenta estraga kondisaun estrada ne’e”, nia dehan.
Estrada ne’e nu’udar alternativu ne’ebé liga bá suku Gildapil no Lebos, inklui munisípiu Kovalima.
Notísia relevante: Komunidade hein intervensaun Governu hadi’a estrada Maliana-Bobonaru
Jornalista: Sergio da Cruz
Editora: Maria Auxiliadora
