DILI, 23 Marsu 2026 (TATOLI)–Prezidente Federasaun Nasionál Basketból Timor-Leste (FNB-TL), Joaquim José Gusmão dos Reis Martins, hateten liga basketból sei realiza hikas iha fulan-Abríl tinan 2026 tanba konfirmadu ona katak Governu liuhusi Ministériu Juventude, Desportu, Arte no Kultura (MJDAK) sei apoia totál.
“Bainhira ami hala’o enkontru dala-rua (2) ho Ministru Nelyo Isaac Sarmento konfirmadu katak, to’o ona iha desizaun ida katak tenke realiza liga basketból 2026. Ida-ne’e novidade di’ak tebes tanba iha tinan sira ba kotuk iha 2016-2017 mak ita hala’o liga maibé paradu to’o agora, maibé iha tinan ida-ne’e ita-nia Governu hakarak apoiu hodi re-ativa hikas,” Joaquim hateten liuhusi konferensia imprensa ne’ebé realiza iha Jináziu Munisipál Dili, segunda ne’e.
Nia dehan, daudaun ne’e FNB-TL hahú halo preparasaun másimu ona hodi realiza liga basketból iha fulan oin ho klube ualu (8) to’o 12 ba Primeira Divizaun no la eziste Segunda Divizaun.
“Ida-ne’e hanesan pasu importante ida, nune’e mak ami hakarak atu konvida klube sira iha Timor-Leste laran tomak atu hakbesik mai iha edifisiu FNB-TL hodi rezista atu partisipa iha liga ne’e. Agora duadaun, ita identifika ona klube hamutuk ualu (8) to’o 12, sira ne’e antes ne’e partisipa ona liga, maibé ita la taka dalan ba klube sira seluk ne’ebé hakarak mai. Kritéria ba klube sira mak tenke iha ekipa feto no mane, sira-nia klube tenke rezista iha Notariadu, kada klube iha treinadór no ofisiál, maibé treinadór tenke iha sertifikadu husi FNB-TL,” nia dehan.
Nia hatutan, liga ne’e sei hala’o ho durasaun tempu naruk hahú Abríl-Dezembru 2026, atu nune’e bele iha kualidade.
“Liga ida-ne’e sei hala’o husi Abríl to’o Dezembru hanesan ne’e, entaun ami husu ba klube sira atu prepara-aan didi’ak, atu bele kompete iha liga ida-ne’e,” nia hateten.
Prepara atleta basketból ba Sea Games 2027
Nia hateten, liga futeból ne’e halao tanba ho ninia prioridade atu haree fini basketból sira hodi bele partisipa iha Sea Games 2027 ne’ebé atu mai.
“Liga ne’e nia prioridade ida mós mak oinsa prepara ita-nia atleta sira ba jogu Sea Games 2027, ida-ne’e Ministru Nelyo Isaac mak fó ona orientasaun,” nia dehan.
Tanba ne’e liga referidu sei la’o iha ámbitu ne’ebé kompetetivu atu nune’e buka fini atleta ba Sea Games ninian.
“Ita sei haree hodi hili atleta ne’ebé di’ak mak lori ba Sea Games,” nia relata.
Nune’e, Prezidente FNB-TL ne’e hato’o agradesimentu ba Governu bele apoiu ona orsamentu ba realizasaun liga ne’e.
“Ami agradese tebes ba Governu tanba apoiu ona orsamentu, orsamentu temi ona maibé nia montante mak seidauk serteza. Maibé ami fiar katak Governu promete ona atu apoiu ami másimu, nune’e ami-nia konfiansa ba Governu maibé ami la taka dalan ba patrosinadór sira hodi fó sira nia apoia,” nia hateten.
Konferensia imprensa ne’e, hala’o direita husi Prezidente FNB-TL ne’ebé akompañadu husi Vise Prezidente no Sekretariu Jerál.
Jornalista : Hortencio Sanchez
Editór : Cancio Ximenes
