DILI, 24 Marsu 2026 (TATOLI)—Xefe Departamentu Forensik iha Hospitál Nasional Guido Valadares (HNGV), Nilton Tilman, informa husi janeiru mai to’o Marsu ne’e, ekipa forensik halo autopsia ba mate-isin hamutuk 21.
“Husi ne’e, kazu omesídiu mak barak, tanba ne’e ita hotu preokupa,” Nilton Tilman informa ba jornalista sira iha nia kna’ar fatin, ohin.
Nia informa, atu fó hatene ba públiku katak iha fulan tolu ne’e iha kazu omesídiu mak ema haree ho matan hanesan iha Munisípiu Ermera no ida iha Dili ne’ebé oho malu iha dalan.
“Kazu sira-ne’e Forensik hala’o nia servisu mak halo ona autopsia hodi prienxe de’it kriteira rua (2) hanesan dahuluk prosedimentu legál mak atu responde pedidu husi Ministériu Publiku no daruak mak atu konfirma katak kanek sira-ne’ebé mak todan iha nia isin-lolon ne’e mak hakotu nia vida. Entaun, ida-ne’e tau hotu relatóriu hodi prepara atu entrega,” nia dehan.
Husi Janeiru ne’e, ekipa forensik halo autopsia ba mate-isin na’in-sia (9) husi kazu omesídiu tolu (3), mate iha na’in-haat (4) no mate naturál rua (2) ne’e sei iha prosesu investigasaun.
Iha Fevereiru, mate ne’ebé sei iha prosesu investigasaun na’in-rua (2), mate natural na’in-rua (2) no suisídiu na’in-ida (1).
Iha Marsu ne’e, mate omesídiu na’in-tolu (3), mate natural na’in-rua (2), suisidiu na’in-ida (1) no mate asidente na’in-ida (1).
Maske nune’e, Nilton Tilman mós preokupa kona-ba rekursu umanu ne’ebé mak hala’o servisu iha mortuáriu iha Hospitál Nasionál Guido Valadares limitadu tebes.
“Ami-nia rekursu umanu laiha mudansa to’o agora, tanba ami-nia ema iha na’in-haat entaun ita haree servisu forensik ne’e aumenta todan tanba forensik mak ida-ne’e de’it. Entaun, ema hotu mai konsentra iha ne’e, tanba servisu forensik ne’e minimál profisionál saúde tenke na’in-ualu (8) tanba na’in-haat (4) ne’e seidauk sufisiente atu hala’o servisu ida-ne’e,” nia dehan.
Jornalista : Felicidade Ximenes
Editór : Cancio Ximenes
