DILI, 31 Marsu 2026 (TATOLI)– Embaixadór Malázia iha Timor-Leste, Dato’ Amarjit Singh Sarjit Singh, tersa ne’e, hala’o enkontru no despede Prezidente Repúblika, José Ramos-Horta, hafoin termina nia mandatu diplomasia iha Timor-Leste.
“Enkontru ne’e hanesan enkontru despedida ida ho Prezidente Ramos-Horta tanba ha’u-nia mandatu termina ona. Durante enkontru, ami na’in-rua (2) halo revizaun ba progresu signifikativu ne’ebé hetan ona husi nasaun rua (2) ne’e iha relasaun bilaterál durante tinan tolu ikus ne’e,” Dato’ Amarjit Singh Sarjit Singh hateten hafoin ramata enkontru ho Xefe Estadu.
Nia dehan, durante enokotru, Prezidente Ramos-Horta espresa ninia agradesimentu kle’an ba ninia dedikasaun no ba Governu Malázia nia apoiu kontinua ba dezenvolvimentu nasionál Timor-Leste nian.
Husi diskusaun importante ne’e destaka mós ba dokumentasaun ne’ebé finaliza ona ba rai Embaixada Malázia nian iha Pantai Kelapa no implementasaun susesu ba Akordu Servisu Aero nian (Air Services Agreement).
Akordu ne’e hasa’e ona koneividade rejionál, ho voo direta ne’ebé hala’o ona entre Dili no Kuala Lumpur liuhusi Batik Air no Aero Dili. Akordu ne’e iha impatu pozitivu hodi hametin ligasaun rejionál, ho introdusaun voo diretu entre Dili no Kuala Lumpur, husi Batik Air no Aero Dili.
Susesu hirak ne’e konsidera hanesan pasu importante ida hodi haforsa lasu ekonomikou no promove interkambiu ne’ebé estreita entre nasaun rua nian.
Nia hatutan, Prezidente Ramos-Horta mós hato’o agradesimentu kle’an ba Governu Malázia, espesiál liu ba Primeiru-Ministru Anwar Ibrahim, ba apoiu iha prosesu adezaun Timor-Leste ba Assosiasaun Nasaun Sudeste Aziátiku (ASEAN).
Iha parte seluk, Embaixador Amarjit afirma fila-fali kompromisu Malázia nian atu apoiu Timor-Leste iha jornada ba prezidénsia ba ASEAN nian iha tinan 2029.
Embaixadór ne’e enfatiza Malázia sei kontinua sai parseiru ne’ebé firme no dedikadu atu garante Timor-Leste nia susesu nu’udar membru plenu iha komunidade ASEAN.
Jornalista : Hortencio Sanchez
Editór : Cancio Ximenes
