DILI, 08 Marsu 2026 (TATOLI)- Sekretáriu Estadu Komunikasaun Sosiál, Expedito Loro Dias Ximenes hateten, Governu sei halo lansamentu fatuk dahuluk ba konstrusaun Sentru Internasionál Konvensaun Dili (ICC) iha loron 20 Maiu tinan ne’e.
Nia subliña, antes to’o lansa Governu liuhusi reuniaun Konsellu Ministru kuarta ne’e, aprova projetu arkitetóniku ba Sentru Konvensaun Dili foun, depoizde fulan rua nia laran prepara dezeñu ohin mak Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay mai aprezenta ba Konsellu Ministru, iha dezeñu ne’e nia formatu ualu husi formatu ualu ne’e Konsellu Ministru aprova dezeñu ida ho karakter ondas.
“Governu hili dezeñu ne’e ho nia karakteristika ondas tanba ita-nia ICC ne’e halo iha tasi ibun Portu Dili, entaun konsellu Ministru konkorda aprova dezeñu karakteristika ondas. Projetu ne’e sei halo husi empreza boot husi Xina, no tuir planu sei lansa faruk dahuluk ba kontratusaun nian iha loron 20 Maiu tinan ne’e no sei ramata iha 20 Maiu 2028 finaliza nafatin iha mandatu Governu dasia nian”, Expedito Loro Dias Ximenes hateten iha Palásiu Governu, Dili hafoin reuniaun Konsellu Ministru, kuartu ne’e.
Tuir nia, projetu estruturante ida-ne’e ho objetivu atu sai uma-na’in ba reuniaun sira ASEAN nian durante Timor-Leste nia prezidénsia iha tinan 2029, inklui simeira Xefe Estadu no Xefe Governu sira nian, no mós eventu ho dimensaun boot sira seluk.
Sentru konvensaun foun sei harii iha área portu tuan, iha Baía Díli nia sorin, no sei inklui edifísiu prinsipál ida ho sala konferénsia, auditóriu no pavillaun sira ba espozisaun, no mós área komplementár sira lazer no turizmu nian, inklui paseiu ida hodi la’o iha kais nia sorin, akuáriu ida no sentru entretenimentu no komérsiu ida.
Jornalista: Arminda Fonseca
Editór: Rafael Ximenes de A. Belo
