KOVALIMA, 08 Abríl 2026 (TATOLI)– Autoridade Munisípiu Kovalima liuhusi Planu Dezenvolviemntu integradu Munisipál (PDIM) sei loke konkursu públiku ba empreza sira atu implementa projetu PDIM hamutuk 12 iha Munisípiu Kovalima.
“Prosesu implementasaun projetu PDIM 2026, ita tuir loloos implementa iha fulan Marsu, maibé iha fallansu tékniku daudaun-ne’e foin prosesu atu loke konkursu públiku iha fulan-ne’e, nune’e empreza sira bele Kompete”, Diretór Servisu Munisipál Planeamentu Integradu no Dezevolvimentu, Carlito Barros Dos Reis, informa ba jornalista sira iha nia servisu fatin Kovalima, ohin.
Bazeia ba planu Asaun Anuál 2026, PDIM implementa projetu 12 foku liu ba ih setór sira hanesan Agrikultura, Saúde, konstruisaun mini merkadu iha postu Administrativu Fatululik no Fohorem, reabilitasaun baleta iha postu Administrativu Suai.
Implementasaun projetu iha setór Agrikultura foku ba konstruisaun edifísiu Servisu Munisipál Agrikultura no konstrui irrigasuan mota Tafara no konstruisaun mini merkadu iha Fatululik no iha Fohorem ida.
Autoridade Kovalima liuhusi PDIM iha 2026 ne’e implementa projetu hamutuk 12 foku ba setór importante sira ne’ebé prevee iha Orsamentu Jerál Estadu hamutuk $2.11.464.
Fó hanoin fali katak iha 2025, Autoridade Kovalima implementa projetu PDIM iha setór saúde no agrikultura hamutuk projetu tolu ne’ebé ho nia orsamentu hamutuk rihun $7-resin
Jornalista: Celestina Teles
Editór: Florencio Miranda Ximenes
