DILI, 08 Abríl 2026 (TATOLI) – Folin petróleu mundiál tuun maka’as porsentu 13-17 hafoin fó sai sesarfogu semana rua entre Estadus Unidus no Iraun, tuir dadus komérsiu nian iha loron Kuarta (8 abríl).
Bazeia ba deklarasaun husi Prezidente Estadu Unidu Amérika, Donald Trump ne’ebé públika iha nia rede sosiál (social truth) iha loron 07 Abríl 2026, deklara konkorda ona ho sesarfogu bilaterál semana rua ho Iraun.
Líder norte-amerikanu nota katak Iraun mós konkorda ona hodi garante seguransa hosi ró petróleu sira iha Estreitu Ormuz.
Hatán ba anúnsiu Prezidente Donald Trump nian, iha loron-kuarta dadeer (08 Abríl), folin petróleu brutu Brent nian ba fulan-Juñu tuun pursentu 12,6 kompara ho presu anteriór dolár amerikanu 91,92 kada barril.
Ida-ne’e nu’udar marka dahuluk dezde loron 23 fulan-Marsu ne’ebé Brent menus husi $92. Entretantu, mina-rai brutu WTI (West Texas Intermediate) ba fulan-Maiu tuun husi pursentu 16.6 ba $94.10.
Antes ne’e, Prezidente Estadu Unidu, Donald Trump, anunsia sesarfogu ho Iraun ba períodu semana rua.
“Bazeia ba konversa entre Primeiru-Ministru Pakistaun Shehbaz Sharif no Komandante Militár Pakistaun Asim Munir, iha ne’ebé sira husu atu ha’u hapara provizóriu atake ba Iraun ho kondisaun katak Repúblika Islámika Iraun nian konkorda atu loke kompleta, imediatu, no seguru husi Estreitu Hormuz nian, ha’u konkorda ona atu suspende bombardeamentu ba Iraun durante semana rua”, Trump hakerek iha mídia sosiál.
“Ida-ne’e sei sai hanesan sesarfogu bilateral”, Trump hateten.
Tatoli
