KOVALIMA , 16 Abríl 2026 (TATOLI) – Komisaun Reguladora Arte Marsiál (KRAM) hala’o fiskalizasaun kona-ba atividade no evolusaun Organizasaun Arte Marsiál (GAM) iha munisípiu Kovalima.
Konselleiru Tékniku Komisaun Reguladora Arte Marsiál, Inspetór Xefe Polísia, Inocensio Araújo da Silva, hateten objetivu husi fiskalizasaun ne’e, atu hatene kle’an kona-ba evolusaun husi atividade Grupu arte Marsiál sira hanesan PSHT, KERA-SAKTI, KORKA no seluk tan iha área fronteira.
“Ha’u rasik mai iha Kovalima,ekipa sira seluk ba RAEOA no Bobonaro buka hatene evolusaun organizasaun durante iha periodu suspensaun,” nia hateten ba jornalista sira iha Komandu PNTL Santa Rosa Kinta ne’e.
Husi rezultadu fiskalizasaun ne’e sei rekomenda parser ba KRAM no Ministériu Juuventude Desportu Arte no Kultura (MJDAK), hodi aprezenta ba Konsellu-Ministru relasiona ho suspesaun atividade GAM hodi hetan deizaun ikus husi Governu iha fulan-juñu 2026.
Bainhira to’o iha Munisípiu Kovalima, ekipa KRAM halo observasaun no fiskalizasaun iha sentru treinamentu PSHT hodi ko’alia ho koordendór husi grupu arte marsiál ne’e no kontinua bá eskuadra PNTL Zumalai hodi hetan informasaun husi autoridade seguransa kona-ba evoluasaun no kontribuisaun grupu arte marsial durante ne’e la’o oinsá ?.
“Ami mai iha suku Tashilin ami asesu informasaun di’ak tanba la mosu problema tanba sidadaun sira ne’ebé mak antes ne’e envolve iha problema kumpre ona nia pena iha prizaun bainhira sai fali sira sai fali autoridade lokál hodi organiza fali sosiedade,” nia hateten.
Iha sorin seluk, Segundu Komandante PNTL, Munisípiu Kovalima Superintendente Asistente Polísia Delvin da Silva, informa situasaun seguransa durante periodu trimestre dahuluk 2026 Komandu PNTL la rejista kazu krime ba Konselleiru KRAM Nasionál.
“PNTL Kovalima informa situasaun seguransa ba ekipa KRAM Nasionál katak GAM iha Kovalima liuhosi nia liderasaun-sira servisu hamutuk di’ak tebes inklui autoridade sira durante fulan-tolu PNTL la rejista ba kazu krime,” nia hatutan.
Nia rekoñese katak durante ne’e iha Grupu Arte Marsiál balun hala’o treinamentu ilegál nune’ee iha tempu besik Komandu PNTL Kovalima sei bolu lidér GAM ne’e atu mai justifika no responsabiliza ba aktu ne’e tuir lei.
Entertantu, KRAM ninia prezensa iha Kovalima hahú iha loron 15 to’o iha loron 17 fulan-abríl tinan 2026, sei hasoru malu ho lider GAM, Komandu PNTL munisípiu, Eskuadra PNTL Tilomar, UPF Kasabauk, FALINTIL-FDTL Tilomar, Suku Beco Postu Suai.
Jornalista: Celestina Teles
Editór: Florencio Miranda Ximenes
