BOBONARU, 17 Abril 2026 (TATOLI)- Komunidade, autoridade lokál no veteranu sira iha aldeia Maganutu, suku Ritabou, Postu Administrativu Maliana, Munisípiu Bobonaru, preokupa ho projetu estrada Hali-Mesak ba Lourivia ne’ebé atraza.
Ho nune’e Sesta ne’e Komunidade, autoridade lokál no veteranu hamutuk organiza malu voluntariamente hadi’ak rasik estrada rurál liga husi área Hali-Mesak ba área Lorivia tanba tempu bai-loro ona mos kompaña Novalo Unipesoál Lda Joinventure ho Dolivaria Unip Lda ne’ebé reponsabiliza obra ne’e to’o agora laiha informasaun atu halo intervensaun no kontinua servisu.
Estrada ne’e kuaze metru 50 hetan estragus totál husi dezastre naturál rai-halai hafoin akontese udan bo’ot iha fulan dezembru tinan kotuk.
Komunidade Florindo Lesu Berre, preokupa tanba implementasaun projetu ne’e la’o atraza no to’o agora paradu hela.
Notísia Relevante:Estrada iha Nunutanan-Ritabou ameasadu atu kotu
“Lolos ne’e ohin ami labele sobu sasan sira halo tiha ne’e, maibé rahun tiha hotu, di’ak liu ami sobu taka fali iha kuak sira ne’e para iha tempu ida ne’e ema bele liu ba mai halo aktividade iha foho ne’ebá. Ami husu ba kompaña bele mai hare, se la’e nia dehan sasan ne’e povu la gosta mak baku rahun,” nia informa ba Jornalista sira, iha terrenu, Sesta ne’e.
Veteranu Guilermina Alu Bere ‘Fulan tolu’, dehan sira deside hadi’ak rasik estrada ne’e tanba durante fulan neen liu ona movimentasaun kareta paradu totál no difikulta tebes aktividade ekonomía, sosiál liu-liu aktividade saúde.
“Ami hadi’a ne’e para ema moras ruma karik Ambulansia mós bele mai, ferik-katuas, Inan Isin rua bele ba ospitál, tanba foin dadauk ita nia komunidade balu atu partus lori ba ospitál labarik mate, tanba sira hulan de’it,” nia dehan.
Komunidade João Florindo hanesan mós traballadór iha projetu ne’e, senti duvida ho kualidade obra ne’e.
“Ita hare rai-henek ne’e la tuir BOQ balu foti husi Bulobu no fatin seluk, la foti iha Kailaku Beadila ida. Tuir ha’u nia hare Penahan ne’e mós hada fatuk mak barak liu ba laran ne’e la tau masa ida. Masa iha oin ne’e de’it kotuk ba ne’e tau los fatuk de’it. Ha’u hatene tanba ha’u mos trabaladòr ne’ebé hola parte iha servisu ne’e,” nia dehan.
Notísia Relevante:Abitante kestiona médiku postu saúde Nunutana la hela permanente
João, akresenta to’o agora kompaña mós seidauk halo pagamentu ba trabaladòr sira.
“Saluran, fatuk nia selu ne’e mós sira ba husu ne’e mak fó, mais Plum Coran nia ne’e nia nunka halo pagamentu, ami ezije ba ezije mós nia nunka selu ami grupu neen nee,” katak Florindo.
Ba kestaun ne’e, Koordenadór Infraestrutura destakadu Ministeriu Obras Públika, Munisípiu Bobonaru, Fernando de Fátima, esklarese durante ne’e servisu paradu tanba klima udan la permite atu halo mobilizasaun materiál ba terrenu.
Fernando subliña ekipa tekniku sira kontinua halo monitorizasaun hodi garante kualidade obra referida. “Servisu seidauk hotu, ida a’at ne’e kuandu servisu fali ita sei haruka sira hadi’a hotu,” nia konklui.
Enkuantu tuir observasaun Tatoli nota katak kompaña nia materiál ba projetu konstrusaun Estrada rurál ne’e iha hela terrenu hanesan makina dulas-fatuk no kareta Micxer no seluk tan.
Projetu R4D ho distánsia kilometru tolu ne’e implementa ho valór kontratu $295,820.62.
Jornalista : Sergio da Cruz
Editora : Armandina Moniz
