DILI, 20 Abríl 2026 (TATOLI) – Segundu Komandante Jerál Polísia Nasionál Timor-Leste (PNTL), Komisária Asistente Polísia Natercia Eufrasia Martins, husu deskulpa hafoin Komandante Jerál PNTL, Komisáriu Asisténte Polísia Afonso dos Santos ‘duni sai’ jornalista sira husi sala enkontru Komandu Jerál PNTL iha ámbitu halo kobertura ba serimónia pose ba Komandante PNTL Munisípiu, Komandante Unidade no kargu Xefia sira iha Komandu Jerál PNTL.
“Ami husu deskulpa ba imi, tanba ami-nia mídia halo ona konvite ofisiál, maibé realidade iha laran ne’e la hanesan, imi espera, fallansu ida ne’ebé mak ami -nia parte halo, ami sei haree fila-fali ba iha oin ne’e, nia protokolu ne’e la’o oinsá”, Komisária Natercia Martins hateten ba jornalista sira hafoin fó pose ba ofisiál susperior sira iha Komandu Jerál PNTL Kaikoli, segunda ne’e.
Nia dehan, Komandu PNTL sei haree hodi hadi’a mekanismu protokolu nune’e iha eventu ne’ebé mak bele kobre no labele kobre.
“Husu nafatin ba jornalista sira atu hatudu nafatin profisionalizmu nu’udár jornalista hodi publika informasaun sira ho justu,” nia fó- hanoin.
Natercia konsidera Koamandante Jerál PNTL Komisáriu Asisténte Polísia Afonso dos Santos nia jestu ne’ebé hatudu ba jornalista ne’e nu’udar jestu individu
“Ida-ne’e idak-idak ninia karáer, ne’ebé ita tenke komprende, tanba dalabarak iha entrevista sira, parte terseira sira edita fali vídeo, buat sira-ne’e, maibé tuir ha’u-nia interpretasaun dalaruma ne’e diskrimina ka lae, maibé ha’u hanoin imi (jornalista sira) komprende buat sira ne’e, maibé ha’u husu nafatin imi-nia profisionalizmu, nu’udár jornalista hodi nafatin publika informasaun ho justu”, nia dehan.
Molok ne’e, Komandante Jerál Polísia Nasionál Timor-Leste (PNTL), Komisáriu Asisténte Polísia Afonso dos Santos ‘duni’ jornalista sai husi sala reuniaun Komandu Jerál bainhira jornalista tama ba foti vídeo no foto iha serimónia toma pose ba kargu xefia sira iha Komandu Jerál PNTL.
Maibé iha ambitu ne’e, bainhira jornalista sira sei hasai foto no foti vídeo, Komandante Jerál PNTL, Komisáriu Asisténte Polísia Afonso dos Santos la’o tama mai sala fatin fó pose ba ofisiál Superiór sira ne’e ho lian maka’as.
“Sé mak konvida jornalista sira mai barbarak, mai barbarak halo saida,” Komisáriu Asistente Polísia Afonso dos Santos hateten ba jornalista sira, iha sala enkontru Komandu Jerál PNTL Kaikoli, segunda ne’e.
Hafoin ida ne’e jornalista sira sai husi sala reuniaun Komandu Jerál PNTL.
Jornalista: Natalino Costa
Editór: Evaristo Soares Martins
