DILI, 21 Abríl 2026 (TATOLI)—Ministru Obra Públika, Samuel Marçal, klarifika ho mudansa dezenu ba prosesu reabilitasaun estrada iha Rate-ain Manleuana, tanba atu redús espasu no halo poupansa orsamentu indemnizasaun ba afetadu sira.
Nia hatutan, distánsia iha estrada Rate-ain ne’e kuazé metru 100 husi ninia rezidénsia no razaun halo kle’ur ba dezenu dalan ne’e, tanba iha estrada ida husi diresaun Elemloi junta ho estrada ezisténsia ida tuun husi Rate-ain, entaun estrada ezistente ne’e iha tiha ona.
“Entaun bainhira ita ajusta estrada rua nia rohan halo hamutuk ne’e bele okupa de’it metru 150. Signifika, ita poupa osan no uma ne’ebé afetadu atu indemniza mós iha hitu de’it. Tanba bainhira ita kontinua hadi’a estrada ho modelu ba loos (lurus) sei okupa espasu metru 700, katak sei afeta ba uma barak normalmente sei gasta osan barak,” Ministru Samuel esplika ba jornalista sira iha Palásiu Governu, ohin.
Nia dehan, iha prosesu alargamentu ne’e iha uma andar rua mak koopera ho Governu, maibé ida la koopera ne’e mai husi fatin seluk, entaun ho ida-ne’e mak hamosu gasta ho efisiénsia.
“Karik ha’u-nia uma mak hetan afetadu ha’u sei fó de’it no ha’u sei lakohi simu indemnizasaun, tamba ha’u-nia família balun mate ba rai ne’e mós ha’u lahusu sai veteranu to’o ohin loron, ne’ebé ha’u servisu ba rai no ba povu ne’e,” nia haktuir.
Jornalista : Alexandra da Costa
Editór : Cancio Ximenes
