DILI, 21 abríl 2026 (TATOLI) – Prezidente Repúblika Timor-Leste, José Ramos-Horta, louva papél Banku Dezenvolvimentu Aziátiku (ADB) nu’udar parseiru xave hodi fó apoiu ba dezenvolvimentu nasionál, partikularmente iha setór infraestrutura.
Prezidente hato’o deklarasaun ne’e bainhira marka prezensa iha inaugurasaun finalizasaun reabilitasaun edifísiu ADB ne’ebé lokaliza iha Farol, Dili, tersa-feira ne’e.
Seremónia tomada pose ne’e hahú ho bensaun husi Pároku Motael, Guilhermino da Silva, no hetan partisipasaun hosi korpu diplomátiku husi nasaun oioin, reprezentante governu, membru Parlamentu Nasionál, Banku Sentrál Timor-Leste (BCTL), no parseiru dezenvolvimentu sira seluk.
Iha ninia diskursu, Prezidente Ramos-Horta subliña katak ADB nu’udar parseiru ida-ne’ebé ativu no laran-luak liu dezde inísiu Timor-Leste nia independénsia.
“Banku Dezenvolvimentu Aziátiku hanesan instituisaun úniku ida – la’ós foka ba lukru, maibé serbí duni povu no nasaun,” nia hatete.
Nia hatutan, durante liu dékada rua, ADB sai nafatin apoiante konstante ba Timor-Leste, tantu durante tempu difisil no mós durante períodu dezenvolvimentu.
Prezidente destaka mós kontribuisaun ADB nian hodi apoia Timor-Leste nia kapasidade ba adezaun ba ASEAN, no até sita nu’udar instituisaun dahuluk ida-ne’ebé fó apoiu hanesan ne’e.
Alende ne’e, Ramos-Horta hato’o nia apresiasaun ba Diretora País ADB nian ba Timor-Leste, Stefania Dina, ba nia dedikasaun no hato’o nia esperansa katak kolaborasaun ne’ebé iha sei kontinua iha futuru.
Entretantu, Diretór Jerál ADB ba Sudeste Aziátiku, Nianshan Zhang, iha ninia diskursu haktuir katak renovasaun ba gabinete reprezentativu ADB nian iha Dili simboliza kompromisu renovadu hodi hametin parseria ho Timor-Leste.
“Eskritóriu ne’e la’ós de’it espasu fíziku ida. Reflete ami nia determinasaun hodi hadi’a dezempeñu projetu nian no habelar oportunidade sira ba komunidade sira iha nasaun tomak”, nia hatete.
Zhang subliña katak dezde Timor-Leste nia independénsia, ADB kontribui ona ba setór oioin, inklui infraestrutura, edukasaun, saúde, no dezenvolvimentu setór privadu.
Nia mós louva Governu Timor-Leste ba nia lideransa no vizaun hodi promove kreximentu inkluzivu no reziliénsia nasionál.
Nune’e ho instalasaun ne’ebé hadi’a ona, ADB sei preparadu liután atu hametin koordenasaun, diálogu, no inovasaun hodi garante katak kada projetu fó impaktu ne’ebé tanjível ba komunidade.
“Inaugurasaun ne’e marka pasu importante ida hodi hametin relasaun entre Timor-Leste no ADB, subliña mós ita-nia kompromisu hamutuk hodi promove dezenvolvimentu sustentável iha país ne’e”, nia dehan.
Jornalista: Natalino Costa
Editór: Rafael Ximenes de A. Belo
