BAUKAU, 23 Abríl 2026 (TATOLI)—Rezultadu teste rekrutamentu ofisiál tékniku iha Sekretáriadu Tekniku Administrasaun Eleitorál (STAE) Munisípiu Baukau tuir planu sei anúnsia iha semana-oin.
Diretór STAE Munisípiu Baukau, Natividade Freitas Guterres, esplika hafoin ramata teste eskrita iha semana-kotuk kandidatu hamutuk na’in-120 mak hakat ba faze entrevista ne’ebé ramata ona tuir teste iha horisehik, Kuarta (22/04/2026).
“Ita sei fó-sai rezultadu finál iha semana-oin. Posibilidade entre Segunda (28/04) ka tarde liu Tersa (29/04),” Diretór STAE Baukau infroma ba TATOLI iha ninia kna’ar fatin, Vila Nova, Kinta ne’e.
Natividade Guterres relata, antes ne’e, kandidatu hamutuk na’in-337 mak tuir teste eskrita hafoin pasa selesaun dokumentu no husi númeru referidu kandidatu na’in-120 mak kontinua ba faze entrevista maibé pesoál na’in-haat mak elemidadu tanba la marka prezensa iha teste entrevista.
Aleinde ne’e, akipa juri atuál sei halo rezumu valór hanesan valór eskrita sei aumenta ho valór entrevista divide ba rua (eskrita+entrevista) iha-ne’ebé kandidatura ho valór aas-liu mak sei konsideradu pasa nu’udár funsionáriu kontratadu ofisiál tenke iha STAE Baukau.
Entretantu, tuir planu, kandidatu na’in-24 mak sei hetan kontratu kompostu pontu vogál na’in-ualu, operadór sistema na’in-ualu no asistente operadór na’in-ualu ne’ebé sei destaka ba postu administrativu ualu iha Munisípiu Baukau.
Jornalista: Natalino Belo
Editór: Xisto Freitas da Piedade
