DILI, 27 Abríl 2026 (TATOLI)—Governu liuhusi Ministériu Obra Públika (MOP) asina kontratu ho empreza manán-na’in sira ba implementasaun projetu reabilitasaun estrada rurál hamutuk pakote 31 iha Munisípiu Aileu, Ainaru, Baukau, Bobonaru no Kovalima.
Ministru Obras Públikas, Samuel Marçal, hato’o parabéns ba empreza sira tanba bele prienxe ona kritéria aprovizionamentu nian, signifika katak empreza sira hahú prepara an sai emprezáriu ne’ebé iha kompromisu ba dezenvolvimentu kontrusaun Estadu nian.
“La kle’ur ita sei asume prezidénsia ASEAN, nune’e setór privadu sai parséria importante ba Governu. Imi mós labele hanoin halo servisu ida hakarak hetan de’it lukru, maibé tenke valoriza oportunidade hodi investe iha imi-nia kompañia. Tau konfiansa ba imi-nia kapasidade rasik hodi fó benefísiu ba povu,” Ministru Samuel informa ba jornalista sira iha edifísiu MOP Kaikoli, ohin.
Governante ne’e dehan, liuhusi projetu sira-ne’ebé bele ajuda forma kapasidade rekursu umanu ba kompañia, tanba bainhira Governu halo ona dezentralizasaun, entaun obra infraestrutura hotu sei prosesu iha kada munisípiu, entaun prepara imi-nia an ba.
“Nune’e, durante tinan ida nia laran husu kompania sira aproveita didi’ak oportunidade liuliu garante kualidade atu obra ne’e bele dura to’o tinan naruk nia laran. Semana rua tan bele hahú ona implementasaun tanba obra ne’e bele fasilita komunidade asesu ba merkadu, saúde, edukasaun no seluk tan,” nia esplika.
Vise-Ministru Infraestrutura MOP, Júlio Amaral, reforsa tan kata, kompania sira tenke utiliza oportunidade ne’e ho di’ak tanba prosesu aprovizionamentu ne’e la fasíl.
“Dalabarak ema balun krítika dehan ha’u mak hatama kompañia sira ba projetu ruma iha Kovalima, ne’e la loos. Tanba ne’e, liuhusi prosesu aprovizionamentu la’ós ajudikasaun direta,” Vise-Ministru MOP, informa.
Tanba ne’e, nia husu ba kompañia sira atu implementa servisu ne’e ho di’ak no tuir regra ne’ebé define iha kontratu liuliu durasaun, entaun tinan oin mai Governu sei la tolera ka prolonga (extende) tempu implementasaun nian.
Aleinde ne’e, Sekretáriu Estadu Asuntu Toponímia no Organizasaun Urbana, Germano Santa Brites Dias, hato’o agradesimentu bele hetan konvite hodi marka prezensa iha atividade ida-ne’e, nune’e nia husu ba kompañia sira atu servisu ho pontualidade kontratu no tenke garante kualidade.
“Maibé bainhira iha impedimentu servisu terrenu husi komunidade no empreza rasik favór ida relata ba Ministru, hafoin ha’u mak sei tun ba tanba ne’e servisu SEATOU nian hodi rezolve problema,” nia apela.
Nia hatutan, labele halo konfrontu ba malu, importante tenke servisu tuir prosedimentu ne’ebé Governu fó, tanba rai ne’e ema hotu nian, entaun tenke iha kompromisu ba dezenvolvimentu.
“Diretór kompañia mós tenke halo kontrolasaun másimu ba ninia traballadór sira atu implementa obra ho kualidade tuir padraun tékniku nian, labele garante de’it ba jerente iha terrenu,” nia dehan.
Iha biban ne’e, tuir Diretór Kompania Baiwari Moris Foun Unipesoál, Lda, Alcino Menezes, garante sei implementa obra ne’e ho di’ak no kualidade atu Governu kontinua tau konfiansa ba ninia kompañia.
“Tanba hanesan imi hatene atu hetan oportunidade ida-ne’e la fasíl no ema barak mak hakarak kompete, maibé laiha oportunidade. Tanba ne’e, ha’u sei implementa obra ne’e iha Aileu Reméxio kuaze estrada rurál kilómetru rua,” nia informa.
Entretantu projetu reabilitasaun estrada rurál ne’e fahe ba pakote 31 ne’ebé kompostu husi munisípiu Baukau, Ainaru, Aileu, Bobonaru no Kovalima, ho durasaun tempu tinan ida no orsamentu hamutuk millaun $15.
mpreza manán-na’in hamutuk 31 mak hanesan; Aisel Girasol Unip. Lda, Sera Palosan Unip. Lda, Baywari Moris Foun Unip. Lda, VCB (Varies Correia Bianco) Unip. Lda, Berpat Unip. Lda, Quibosnz92 Unip. Lda, Lito Gamboa Unip. Lda, NenovN5 Unip. Lda. JV Waiaca RO Lda, JSN Imanuel 25 Unip. Lda, JV Macalaco Construction Unip. Lda, Jatono Unip. Lda, Merijossa DGM Unip. Lda.
Empreza Bengram Unip. Lda. JV Rozi Construction Unip. Lda, Janicia Unip. Lda, Dtryan-13 Unip. Lda, Adedebideall Unip. Lda. JV Raco Lda, Crescendo Unip. Lda, Zhavia Unip. Lda, LNMoniz Uip. Lda, Kudaguah Unip. Lda, Glove Unip. Lda, Buongirno Unip. Lda, Akon Lay Unip. Lda, Alju Unip. Lda. JV Lica Tada Unip. Lda, RD88 Unip. Lda, Tofranditar Unip. Lda, Jenimar Bosomori Unip. Lda, Peter Livingstone Unip. Lda, Lifean Unip, Lda, Jino Linda Unip. Lda, Ochy Choky Unip. Lda, Unidade Unip. Lda.
Jornalista : Alexandra da Costa
Editór : Cancio Ximenes
