DILI, 29 Abríl 2026 (TATOLI)—Polísia Sientífika Investigasaun Kriminál (PCIC, sigla portugéz), Kuarta ne’e, halo buska no apreensaun iha Gabinete Timor GAP, E.P, Timor Plaza.
Buska no apreensaun ne’e nu’udar kontinuasaun ba Komisaun Antí-Korrupasaun (CAC, sigla portugéz) nia operasaun hasoru Vise-Prezidente Timor GAP, E.P ho inisiál AC iha Kuarta (17/12/2025).
Nune’e, ohin ekipa hetan mandadu judisiál husi Ministériu Públiku hodi kontinua halo buska iha serbisu fatin hahú husi tuku 10:00 to’o 15:30 hodi apura faktu sira.
Notísia relevante : CAC klarifika buska no apreensaun iha Dirijente Timor GAP nia rezidénsia
Tuir observsaun Jornalista Ajénsia TATOLI iha terrenu, PCIC kontinua apura faktu dokumentál sira iha Gabinete Timor GAP no tuir planu sei termina iha lorokraik tuku 17:00.
Maibé, iha parte lorokraik maizumenus tuku 15:00, ekipa PCIC asegura hodi lori AC husi nia Gabinete ba edifísiu PCIC Kolmera hodi halo identifikasaun.
Jornalista sira tenta lansa pergunta kona-ba razaun PCIC halo operasaun ne’e, maibé Xefe ekipa PCIC Dedi da Silva lakohi fó komentáriu tanba prosesu buska no apreensaun kontinua la’o.
Jornalista : Natalino Costa
Editora : Julia Chatarina
