VIKEKE, 30 Abríl 2026 (TATOLI)—Diretór Fundasaun Knua Haberan Komunidade (F-KHK), Augusto Pinto, sujere ba Governu aselera lei kona-ba hasa’e saláriu mínimu ba traballadór sira iha Timor-Leste.
“Ha’u hanoin ita apoiu ba Governu hodi aselera revizaun ba lei kona-ba saláriu míninu nian ba traballadór sira. Maibé, kuandu lei ne’e aprova ita-nia Governu presiza halo kontrolu folin sasán sira iha merkadu, atubele hatene folin sasán ne’ebé justu. Se lae ita hasa’e tiha saláriu, maibé folin sasán iha merkadu sa’e nafatin. Sa’e ida-ne’e mós sei fó nafatin impaktu ba ita-nia traballadór sira,” Augusto Pinto ba TATOLI iha Postu Vikeke Vila, Kinta ne’e.
Tanba ne’e, nia dehan, bainhira traballadór sira-nia saláriu mínimu Governu hasa’e ona, presiza kontrolu folin sasán sira-ne’ebé faan iha merkadu ne’e la bele sa’e, atu nune’e ajuda traballadór sira.
Notísia relevante: Gabinete jurídiku KM sei halo revizaun ba ezbosu lei saláriu mínimu
Nia dehan parte sosiedade sivíl konkorda tebes ba saláriu mínimu ne’ebé Governu liuhusi Sekretaria Estadu Formasaun Profisionál no Empregu (SEFOPE) propoin husi $115 sa’e $154, ne’e bele tulun ona traballadór sira.
Iha fatin ketak, Prezidente Kámara Komérsiu Indústria Timor-Leste (CCITL-sigla portugeza) Munisípiu Vikeke, Florencio Armindo da Conceição G. da Costa, hateten CCITL Munisípiu Vikeke aseita Governu revee saláriu minimu ba traballadór sira.
“Husi ami-nia parte liga ba Governu nia planu atu hasa’e saláriu mínimu ne’e pertenente tebes, tanba ita haree ba nesesidade agora buat hotu folin sa’e. Entaun, ita-nia traballadór sira-nia saláriu mós tenke sa’e,” nia subliña.
Nia fó-hanoin Governu nia polítika ba revizaun ba saláriu mínimu ne’e mak hetan ona aprovasaun, empreza sira sei selu tuir saláriu ne’ebé Governu deside.
Jornalista: Vitorino Lopes da Costa
Editór: Xisto Freitas Piedade
