DILI, 04 Abríl 2026 (TATOLI)—Primeiru-Ministru, Kay Rala Xanana Gusmão, domingu 03 Maiu) ne’e, hamutuk ho delegasaun hala’o vizita traballu ba Brunei Darusalan hodi diskute kona-ba koopersaun bilaterál iha setór enerjétika no saúde nian.
Bainhira Xefe Governu no delegasaun sira to’o iha aeroportu internasionál Bandar Sri Begawan, simu diretamente husi protokolu konsulares Brunei Darusalam, Mohamad Hazreen Patel, Dato Paduka HJ Masri ho Guarda Ondra Militár, ne’ebé kontinua akompania ba fatin deskansa.
Tuir ajenda ne’ebé Agência Tatoli asesu katak, Primeiru-Ministru, Kay Rala Xanana Gusmão, sei hasoru malu ho liurai Brunei Darusalam, Sultan Haji Hassanai Bolkiah Mu’izzadin Waddaulah, iha palásiu (istana) Nurul Iman Brunei.
Aleinde ne’e durante vizita ofisiál iha Brunei Darusalam, Governu Timor-Leste liuhusi Ministériu Petróleu no Rekursu Minerál (MPRM) inklui Ministériu Saúde (MS) sei asina memorandu intendimentu (MoU) ho Governu Brunei Darusalam atu fortalese servisu bilaterál nian ba setór enerjétika no saúde nian.
Entretantu, delegasaun hirak ne’ebé akompania Xefe Governu nia vizita ofisiál ba Brunei Darusalam ne’e kompostu husi Vise-Primeiru-Ministru, Ministériu Koordenadór Asuntu Ekonómiku, Ministru Turizmu Ambiente, Francisco Kalbuadi Lay, Vise Primeiru-Ministru, Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano Assanami Sabino, Ministru Negósiu Estranjeiru no Kooperasaun, Bendito dos Santos Freitas.
Akompaña mós husi Ministru Petróleu no Rekursu Minerál, Francisco da Costa Monteiro, Ministra Saúde, Elia Amaral, Vise Ministra ba Asuntu ASEAN, Milena Rangel, Sekretáriu Estadu Komunikasaun Sosiál, Expedito Dias Ximenes, Xefe Gabinete Primeiru-Ministru, Elizabeth Exposto no Embaixadór Timor-Leste iha Brunei, Abel Guterres.
Jornalista : Alexandra da Costa
Editór : Cancio Ximenes
