KOVALIMA, 04 Maiu 2026 (TATOLI)- Ministériu Finansa (MF) liuhusi Diresaun Jerál Planeamentu Orsamentu, hala’o konsultasaun ho Autoridade Kovalima atu rona idea kona-bá Orsamentu Jerál Estadu 2027 hodi liga komunidade nia moris di’ak.
Rezultadu husi konsultasaun ida-ne’e sei uza ba Relatóriu Konsultasaun Nasionál hodi diefine prioridade Governu, Planu Asaun Anuál no Orsamentu 2027.
“ Ha’u dehan forum ida-ne’e ita hala’o konsulta ba autoridade sira no hala’o diskusaun atu hato’o ita-boot sira-nia opiniaun kona-bá dezenvolvimentu iha Kovalima hodi bele orsamenta iha OJE 2027”, Diretór Jerál Ministériu Finansa, (MF), José Alexandre de Carvalho liuhusi nia diskursu iha salaun AMC.
Tanba Orsamentu Jerál Estadu (OJE) mak hanesan instrumentu prinsipál ne’ebé mak Governu fornese servisu ba nia sidadaun sira hanesan Edukasaun, Saúde, Infraestrutura , Bee-moos no saneiamentu, servisu protesaun Sosiál no seluk tan.
“Orsamentu bele efetivu bainhira problema real ne’ebé mak komunidade hasoru loro-loron importante. Ami hakarak atu komprende dezafiu ne’ebé mak ita boot sira hasoru, oinsá mak bele afeita ba ita-boot sira-nia moris lor-loron hodi propoin solusaun”nia dehan.
Prezidente Autoridade Kovalima, Miguel Armada Cardoso, dehan programa ne’e hanesan konsultasaun atu hatene no kria planu no ba to’o iha faze implementasaun.
“Konsultasaun ne’e atu hatene katak ita rasik mak kria planu no ita rasik mak halo implementasaun maibé tenke iha monitorizasaun no avaliasaun”,nia dehan.
Konsultasaun públiku ne’e atu rona sidadaun sira-nia lian no esperénsia komprende dezafiu real kona-bá prestasaun servisu públiku iha munisípiu hotu no define prióridade Dezenvolvimentu.
Iha diskusaun ne’e hodi haree mós setór importante sira hanesan, kapitál sosiál haree kona-bá edukasaun no Saúde mak hanesan falta profesór no pesoál saúde, falta aimoruk no ekipamentu Saúde,
Setór Infraestrutura haree ba preokupasaun prinsipál sira hanesan estrada no ponte aat, liuliu iha tempu udan, asesu ba bee no saneamentu limitadu, eletrisidade la estável.
Setór Dezenvolvimentu ekonómia mak agrikultura iha potensial bo’ot ba empregu, falta asesu ba merkadu no finansiamentu, Joven no feto enfrenta barreira atu hetan oportunidade. Servisu públiku seidauk efisiente presiza transparénsia no responsabilidade, sistema justisa lento no difisil atu asesu.
Governasaun no servisu publiku, Sidadaun sira hato’o servisu públiku seidauk efisiente, nune’e presiza transparénsia no responsabilidade sistema justisa tanba lento no difisil atu asesu.
Jornalista:Celestina Teles
Editór: Florencio Miranda Miranda Ximenes
