DILI, 05 Maiu 2026 (TATOLI)—Primeiru-Ministru, Kay Rala Xanana Gusmão apresia no konsidera ho Brunei Darussalam ne’ebé durante ne’e kontribui ona ba pás no prosperiedade iha nasaun Sudeste Aziátiku.
Primeiru-Ministru hato’o apresiasaun ne’e iha ámbitu almosu hamutuk ho Liurai Brunei Darussalam, Sultan Haji Hassanal Bolkiah Mu’izzaddin Waddaulah inklui prezensa membru família Reál nian, iha Palásiu Nurul Iman, segunda (04 Maiu 2026) ne’e.
“Ami hanoin hikas ho apresiasaun boot, ne’ebé ho ita-boot nia vizita ba Timor-Leste iha tinan 2024. Vizita ne’ebá reflete forsa husi lasu sira entre ita-nia nasaun sira no vontade di’ak entre ita-nia povu sira,” PM Xanana hateten bainhira almosu hamutuk ho liurai Brunei iha ninia Palásiu Nurul Iman, Brunei.
Tamba ne’e, Xefe Governu konsidera katak Brunei Darussalam iha papél importante iha rejiaun ne’e, liuhusi ita-boot nia lideransa no kompromisu ba ASEAN, Brunei Darussalam kontribui ona pás no prosperiedade iha nasaun Sudeste Aziátiku.
Aleinde ne’e, PM Xanana mós observa katak ohin-loron mundu hasoru krize enerjétika ne’ebé provoka ona sira liuhusi ekonomia globál, tanba ne’e papél bilaterál ne’e importante liután atu tulun malu.
“Ha’u elojia ita-boot tanba ajuda mantein estabilidade rejionál durante krize ida-ne’e liuhusi esportasaun mina-rai no gás ho konfiável, enérjia husi Brunei Darussalam ajuda ona nasaun sira atu evita interrupsaun grave husi falta kombustível. Interrupsaun ne’ebé sei iha impaktu boot liubá sira-ne’ebé vulnerável liu iha ita-nia rejiaun,” PM Xanana hateten.
Nune’e, nia hato’o agradesimentu ba Brunei Darussalam ne’ebé firme apoiu Timor-Leste atu adere ba ASEAN, tanba TL nia adezaun bá ASEAN mak realizasaun aspirasaun nasionál ida-ne’ebé iha kle’ur ona.
“Nu’udár membru ASEAN, Timor-Leste oras-ne’e halo parte iha komunidade rejiaun ekonómiku no estratéjiku, nune’e ami komprometidu atu kontribui mós pás, estabilidade no prosperiedade ne’ebé di’ak ba nasaun membru hotu,” nia dehan.
Iha oportunidade ne’e, Timor-Leste mós sente onradu atu assume Prezidénsia ASEAN nian iha 2029 no hein atu servisu besik ho Brunei Darussalam iha preparasaun ba pasu importante ida-ne’e.
“Agradese ba amizade ne’ebé Brunei Darussalam hatudu bá Timor-Leste no apoiu tomak bainhira Timor hola fatin iha rejiaun ida-ne’e,” nia hateten.
Tanba ne’e, lori delegasaun nia naran, PM Xanana hato’o agradesimentu ba ospitalidade ne’ebé oferese no konsidera Timor-Leste ho Brunei Darussalam iha relasaun bilaterál ne’ebé besik no dura liután ba futuru oin mai.
Jornalista : Alexandra da Costa
Editór : Cancio Ximenes
