DILI, 21 Maiu 2026 (TATOLI) – Governu prevee millaun $3 iha proposta Orsamentu Retifikativu (OR) atu halo tan rekrutamentu ba membru Polísia Nasionál Timor-Leste (PNTL) foun hamtuk na’in-400.
Ministra Finansa, Santina Cardoso, hato’o asuntu ne’e hodi responde ba deputadu sira iha ámbitu audiénsia públika kona-ba proposta Orsamentu Retifikativu ho Komisaun C ne’ebé trata Asuntu Finansa Públika no Komisaun D ba Asuntu Ekonomia no Dezenvolvimentu iha Parlamentu Nasionál, ohin.
Iha proposta OR ne’e, Governu prevee medida ida ba seguransa nasionál ho verba millaun $3, ne’ebé millaun $1 ba saláriu no vensimentu no millaun $2 ba bens no servisu hodi kobre ba kustu formasaun, ekipamentu no seluk tan hodi bele realiza rekrutamentu.
Governante ne’e dehan iha orsamentu 2026 aloka tiha ona atu halo mós rekrutamentu foun ba kadete 400 ne’ebé sei halo iha tinan ne’e. Maibé, prosesu rekrutamentu ne’e parte Ministériu Interiór no Komandu PNTL estende até agora, tanba haree hela prosesu mekanizmu ba rekrutamentu nian.
“Tanba haree ba iha tinan oin iha númeru polísia ne’ebé sei tama ba reforma, entaun iha nesesidade duni atu aumenta tan 400. Entaun, ida-ne’e mak ita aumenta tan millaun $3″, nia hateten.
Nesesidade ne’e mós tanba iha tinan oin país iha atividade lubun ne’ebé presiza atu mantein númeru polísia ne’ebé bele responde ba situasaun ein-previstu sira.
Lembra katak, iha 11 Fevereiru 2026, Konsellu Ministru aprova projetu rezolusaun Governu ne’ebé aprezenta husi Ministru Interiór, Francisco da Costa Guterres, kona-ba suspensaun temporária no revizaun ba konkursu públiku admisaun iha kursu formasaun ba ajente PNTL.
Desizaun ne’e hakarak asegura transparénsia, legalidade no kredibilidade iha prosesu rekrutamentu hodi konsidera dúvida preokupasaun sira ne’ebé hato’o husi kandidatu sira no entidade oioin kona-ba kumprimentu rekizitu balun no regularidade iha faze konkursu nian.
Hodi reforsa mekanizmu supervizaun no fiskalizasaun.
Notísia relevante: Polémika rekrutamentu PNTL hein desizaun Konsellu Ministru
Jornalista: Nelson de Sousa
Editora: Maria Auxiliadora
