PDIM 2026 iha Bobonaru: Empreza liu 70 kompete konkursu públiku ba projetu 22

BOBONARU, 05 Maiu 2026 (TATOLI) – Empreza lokál iha munisípiu Bobonaru liu 70 daudaun ne’e kompete hela konkursu públiku hodi hadau-malu atu sai manán-na’in ba projetu Planu Dezenvolvimentu Integradu Munisipál (PDIM) tinan 2026 ho totál projetu 22.

Diretór PDIM Munisípiu Bobonaru, Rui Bere Mau, esplika, empreza 90-resin mak submete dukumentu, tuir pre-kualifikasaun, maibé iha 70-resin de’it mak pasa iha selesaun dukumentu no foin ne’e vizita ona lokál projetu.

Tuir oráriu iha loron 07 fulan ne’e ekipa juri sei halo avaliasaun dukumentu husi empreza hirak-ne’e hafoin anunsia rezultadu finál.

Rui Bere fó-sai katak, etapa primeiru diresaun aprovizionamentu fó-sai ona konvite hodi halo site visited, kompañia sira prepara dezeñu ho BOQ no loron-kuarta, 06 maiu ne’e ne’e mak loke oferta.

“Tuir oráriu dia (07/05) ita hahú halo avaliasaun ba dukumentu empreza sira hamutuk 70-resin mak kompete, maibé atu manán ne’e 22 de’it, maske sira barak mak compete,” nia informa ba TATOLI, iha kna’ar-fatin, tersa ne’e

Nia dehan, lokál projetu fiksu no preparadu ona hein de’it prosesu anunsiu rezultadu finál ba empreza vensedór hafoin tama ba implementasaun, tanba tuir regra projetu hotu-hotu sura husi loron hahú implementasaun to’o loron 31 dezembru tenke finaliza ho progresu fizíku 60% no 40% sei kontinua iha tinan oin 2027.
Diretór ne’e fiar katak ba oin empreza selesionadu hanesan manán-na’in sei kumpri regra hirak-ne’e hodi ezekuta obra 22 finaliza tuir tempu determinadu no garante kualidade.

“Tuir kontratu, purezemplu ita fó fulan tolu, ita haree katak fulan-tolu nia progresu la la’o, entaun nia regra katak ita tenke konvida fali kompañia seluk atu bele kontinua, maibé ita garante katak hanesan Bobonaru-oan, sira mai kompete ona sira mós prontu responsabliza halo projetu ho di’ak no kualidade,” nia fó hanoin ba futuru empreza manán-na’in sira.

Autoridade Munisípiu Bobonaru iha tinan-2026 ne’e hetan projetu Planu Integradu Dezenvolvimentu Integradu Munisipál (PDIM) hamutuk 22 ho totál orsamentu $2,750,460.00 (millaun rua-resin).

Projetu hirak-ne’e mak hanesan;

Konstrusaun bee-moos sistema bomba eletrisidade iha Aidabaleten Foho, suku Aidabaleten, Postu Administrativu Atabae ho valór orsamentu $180,000.00
Kanalizasaun bee-moos sistema bomba eletrisidade iha aldeia Ai-Asa, Suku Leo-hitu, Postu administrativu Balibo ho valór $210,000.00
Konstrusaun morru hale’u edifísiu Komisaun Nasionál Eleisaun (CNE, sigla portugés) no salaun apuramentu munisipal $72,000.00.
Konstrusaun uma ba fatin rai ai-moruk iha Balibo Vila ho totál orsamentu rihun $45
Konstrusaun Postu Saúde iha Suku Tapo, Postu Administrativu Bobonaru ho orsamentu $120,000.00
Konstrusaun sala tolu iha eskola Ensinu Báziku Filiál (EBF) Gelokaet, Suku Ritabou, Postu Administrativu Maliana ho totál orsamentu $72,000.00
Konstrusaun bee-moos iha Aldeia Lalis, suku Kowa, Postu Administrativu Balibó ho valór orsamentu $90,000.00
Reablitasaun sistema kanalizasaun bee-matan Bol Thama no Laho, Suku Tapo-Memu, Postu Administrativu Maliana ho valór $108.000.00.
Konstrusaun Postu Saúde suku Lontas, Postu Administrativu Lolotoe ho valór $78,000.00
Reablitasaun sistema bee-moos gravitasaun iha aldeia Silagolo, Dilai no Anon, suku Lupal no Guda, Postu Administrativu Lolotoe ho valór $180,000.00
Kanalizasaun bee-moos sistema bomba elétrika iha aldeia Atubuti, Tuturema, Aitutu, suku Raiheu no Atudara Postu Administrativu Kailaku ho valór $105,000.00
Konstrusaun irrigasaun Sordoli ho totál orsamentu $270,000.00
Konstrusaun merkadu Postu Administrativu Lolotoe ho totál orsamentu $150,000.00
Kontinuasaun konstrusaun merkadu Mau-Mali ho orsamentu $294,000.00.
Konstrusaun Kampu multi-funsaun Balibó ho valór $54,000.00
Kontinuasaun konstrusaun irrigasaun Raegeren ho valór $21,000.00
Konstrusaun sala tolu iha EBF Ozo, suku Lontas ho valór $72,000.00
Reabilitasaun kanalizasaun bee-moos iha aldeia Oceli, suku Guda ho valór $60,000.00
konstrusaun Postu Saúde no rezidénsia pesoál saúde iha suku Oe-leu ho valór $108,000.00
konstrusaun sala tolu EBC Dom Kaileto no reablitasaun sala neen iha Ex-Primária Dom Kaileto multi-setór ho valór $150,000.00
Konstrusaun sala neen iha Poeleu, Suku Male-Ubu ho valór $150,000.00
Konstrusaun eskola sala tolu iha EBF Paralelu Saburai ho kustu $66,000.00.