DILI, 08 Maiu 2026 (TATOLI)—Prezidente Autoridade Nasionál Lisensiamentu Ambientál (ANLA), Maximiano Oliveira, klarifika katak ANLA atribui ona lisensamentu ambientál ba empreza atu halo projetu reabilitasaun estrada urbana Glenu ne’e atribui iha 30 Maiu 2025 no estrada diresaun Ermera ba Letefoho ne’e atribui iha tinan 2024.
Notísia Relevante: MOP-Empreza mobiliza no entrega ekipamentu reabilitasaun estrada Glenu-Letefoho ba PAM Ermera
“Signifika kompañia bele halo ona nia servisu iha terrenu tanba hetan ona autorizasaun lisensa ambientál husi ANLA,” Prezidente ANLA ne’e inform aba jornalsita sira liuhusi konferénsia imprensa ne’ebé hala’o iha nia kna’ar fatin, Akait, ohin.
Projetu reabilitasaun estrada Glenu ba Letefoho ne’e, ANLA hasai ona lisensiamentu ambientál iha 30 Maiu 2025 no reabilitasaun estrada diresaun husi Letefoho to’o Lourba (Bobonaru) ne’e mós ANLA hasai lisensiamentu iha tinan 2024, signifika katak kompañia bele halo ona servisu iha terrenu.
“Maibé iha parte seluk kompañia mós submete tan projetu ba konstrusaun estrada foun Kolkoli to’o Katrai Kraik kuaze iha distánsia kilómetruualu ( 8), dokumentu ne’e submete iha loron 03 fulan-Jullu 2025 no lisensiamentu ambientál ne’e emite iha loron 11 fulan-Jullu 2025,” nia dehan.
Signifika katak ANLA apoia ba projetu refere no kona-ba lisensiamentu ba fatin akampamentu ne’ebé uza ba fatin deskansa ba traballadór no materiál konstrusaun mak seidauk sai (emite), tanba foin submete iha loron 28 fulan-Abríl 2026 no dokumentu ne’e seidauk prienxe rekezitu.
“Maibé kompañia mai hasoru diretamente ho ha’u, no iha diskusaun ha’u dehan kompañia bele hala’o sira-nia servisu iha terrenu la presiza hein lisensiamentu ambientál tanba sei iha prosesu avaliasaun. Kompania mós submete ona karta mai ANLA iha loron 23 fulan-Abríl atu harii sira-nia akampamentu,” nia informa.
Enkuantu, nia hatutan, iha loron 29 fulan-Abríl kompañia mós sei submete tan karta mai ANLA katak sira sei hala’o serimónia kulturál iha loron 30 fulan-Abríl 2026 iha lokalizasaun sinál Estadu Letefoho Ermera.
“Entaun ami la halo impedimentu ka atraza ba prosesu hirak ne’e,” nia hateten.
Iha biban ne’e, Ministru Obra Públika, Samuel Marçal, esplika lisensiamentu ambientál ne’ebé kompañia trata ne’e kona-ba akampamentu, tau sasán lojístika konstrusaun nian.
“Horisehik kompañia mai hasoru ona ha’u, katak sira submete ona pedidu lisensiamentu ambientál ba akampamentu ne’e iha semana rua liubá, prinsipalmente sira-nia materiál kompletu hotu ona,” nia dehan.
Governante ne’e dehan, deklarasaun ANLA dehan prosesu konstrusaun bele la’o ona, maibé kritéria husi Banku Mundiál no atividade projetu ida-ne’e kompañia tenke iha fatin akampamentu atu tau materiál konstrusaun, la’ós rai arbiru iha dalan ninin tanba projetu kilómeteu 28 kompañia tenke estabelese akampamentu tolu.
“Entaun, tuir ita-nia regra tenke iha lisensiamentu ambientál, ami-nia ekipa ministériu mós halo hela koordenasaun ho ANLA. Fiar katak bele aprova lalais atu projetu bele la’o,” nia dehan.
Jornalista : Alexandra da Costa
Editór : Cancio Ximenes
