DILI, 08 Maiu 2026 (TATOLI) – Diretór Ezekutivu Permatil, Ego Lemos, sesta ne’e, hasoru malu no relata kona-ba espansaun internasionál modelu konservasaun bee iha Timor-Leste ba Prezidente Repúblika, José Ramos-Horta.
Notísia Relevante: Konservasaun bee: PERMATIL hamoris fali bee-matan 300-resin iha territóriu TL
“Enkontru ne’e ami ko’alia kona-ba espansaun internasionál konservasaun bee, ida-ne’e mak ita aprezenta ba Prezidente no Prezidente apoiu. Nune’e, ko’alia mós kona-ba partisipasaun Timor-Leste nian iha sorumutu Pre-COP 31,” Ego Lemos hateten ba jornalista sira hafoin ramata enkontru ho Xefe Estadu iha Palásiu Prezidenisál Nicolau Lobato, Bairru Pite.
Ego Lemos dehan, durante audiénsia ne’e, Prezidente fó nia apoiu tomak ba inisiativa sustentabilidade ne’ebé lidera husi foinsa’e sira hodi konkorda atu asina sertifikasaun ofisiál ba International Permaculture Youth Convergence 2026.
Diskusaun husi parte rua (2) ne’e foka liu ba partisipasaun Timor-Leste nian iha sorumutu Pre-COP 31 iha Fiji no Vanuatu, inklui mós delegasaun ofisiál ba COP 31, ne’ebé Prezidente konfirma katak sei lidera husi Primeiru-Ministru Xanana Gusmão no Embaixadór Nasionál ba Mudansa Klimátika, Adão Barbosa.
Sorumutu ne’e mós destaka susesu boot husi esforsu konservasaun bee iha Timor-Leste, ne’ebé konsege kura fali bee-matan hamutuk 800 resin iha territóriu laran tomak.
Nune’e, Ego Lemos informa ba Prezidente kona-ba “Permatil Global,” inisiativa foun ida atu esporta modelu Timór nian ne’ebé susesu ne’e ba viziñu sira iha Pasífiku hanesan Samoa no Papua Nova Guiné.
Atu haforsa liután lideransa globál ne’e, Palásiu Prezidensiál sei sai uma-na’in ba Simpózium Internasionál kona-ba Bee, Pás no Diplomásia iha fulan-outubru oin mai, hodi simu Enviadu Espesiál ONU ba Bee atu mai haree rasik progresu Timor-Leste nian.
Jornalista : Hortêncio Sanchez
Editór : Cancio Ximenes
