DILI, 13 Maiu 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu proposta-lei ba alterasaun dahuluk Lei nú. 8/2025, 27 Novembru, kona-ba Orsamentu Jerál Estadu ba tinan 2026 (OJE 2026), ne’ebé aprezenta husi Ministra Finansa, Santina José Rodrigues F. Viegas Cardoso,
Proposta ne’e prevee ajustamentu ida ba OJE 2026 hodi hatán ba aumentu husi folin kombustível internasionál, relasiona ho konflitu iha Médiu Oriente, kustu ne’ebé mosu husi ezersísiu husi Prezidénsia Pro Tempore Komunidade País Lian Portugés (CPLP, sigla iha lian Portugés) nian neʼebé asume husi Timor-Leste hafoin aprovasaun OJE 2026, nune’e mós despeza sira-ne’ebé relasiona ho Rejiaun Administrativu Espesiál Oe-Kusi Ambenu.
Ministra Finansa, Santina Cardoso, hateten ho situasaun krize iha Médiu Oriente no iha afetasaun mós ba Timor-Leste liuliu kona ba mina nia nomós aihan nian.
“Entaun Governu prepara osamentu ratifikativu ba Parlamentu Nasionál, no orsamentu ne’e Governu la foti husi fundu petrólifeiru nian, maibé haree ba finansamentu programa ne’ebe la funsiona ka taka tiha ona,” Ministra Finansa ne’e relata ba jornalista sira iha Palásiu Governu, ohin
Nia hatutan, orsamentu ida-ne’e hetan ona aprovasaun husi Konsellu Ministru sira sei prepara finaliza lei ne’e atu aban lori ba Parlamentu Nasionál.
Nune’e ho alterasaun ida-ne’e, montante konsolidadu husi OJE 2026 aumenta maizumenus millaun $101,1, sa’e ba biliaun $2,39, entaun aumentu ida-ne’e la’ós rezultadu reforsu transferénsia ruma husi Fundu Petrolíferu, maibé liu-liu reajustamentu husi fonte finansiamentu Estadu nian liuhosi utilizasaun saldu jerénsia, saldu neʼebé disponivel iha konta bankária neʼebé la efetiva (ne’ebé la uza, no mós reforsu husi reseita doméstika sira.
Entretantu proposta orsamentu retifikativu ho objetivu mós atu hamenus impaktu ekonómiku husi aumentu folin kombustível internasionál, iha kontestu dependénsia maka’as ba importasaun liuliu kombustivel no produtu ai-han, ne’ebé afeta diretamente kustu transporte, no mós inflasaun doméstika.
Tuir projesaun husi Ministériu Finansa, maske iha aumentu iha folin kombustivel nian iha nivel internasionál, prevee katak média inflasaun anuál iha tinan 2026 sei sa’e ba 2,2%, kompara ho 1,2% iha tinan 2025, lahó aumentu ne’ebé signifikativu, tanba medida sira-ne’ebé mak Governu adota hodi estabiliza folin kombustível.
Jornalista : Alexandra da Costa
Editór : Cancio Ximenes
