DILI, 13 Maiu 2026 (TATOLI)—Federasaun Atletizmu Timor-Leste (FATL) realiza formasaun tékniku kona-ba teknolojia Time Chips Electronic ba joven na’in-15 ho objetivu atu transforma sistema sukat tempu manuál ba dijitál ne’ebé modernu.
Formasaun ne’e realiza iha Jináziu Munisipál Dili durante loron tolu ne’ebé hetan apoiu orsamentu husi Ministériu Juventude Desportu Arte no Kultura (MJDAK).
Diretór Jerál Desportu Ministériu Juventude Desportu Arte no Kultura (MJDAK), David Tomas de Deus, ne’ebé loke formasaun ne’e hateten importánsia husi teknolojia ne’e ba futuru desportu nasionál.
“Ita tenke adapta ho evolusaun mundiál. Aproveita oportunidade ne’e hodi hasa’e koñesimentu teknolójiku, nune’e ita-nia atletízmu bele kompete ho profisionalizmu ne’ebé aas iha nível rejionál,” David hateten iha nia intervensaun.
Teknolojia eletrónika, tranzisaun husi sistema manuál ba Time Chips hodi asegura kualidade rezultadu tempu ne’ebé real-time, presizu no tuir padraun kumpetisaun internasionál.
Formasaun ne’e, MJDAK apoiu finanseiru hamutuk $7,000 hodi kobre formasaun intensivu.
Formasaun ne’e nudar mós, kapasitasaun no prepara tékniku foinsa’e sira hodi bele jere eventu desportivu boot sira iha nível ASEAN no kampionatu internasionál seluk.
Inovasaun ne’e sei evita kestionamentu ba rezultadu kompetisaun no hasa’e kredibilidade federasaun nian.
Tnaba ne’e, MJDAK kontinua dudu inovasaun hodi lori desportu Timor-Leste ba oin ho kbiit teknolojia nian.
Jornalista : Hortêncio Sanchez
Editór : Cancio Ximenes
