DILI, 13 Maiu 2026 (TATOLI)—Ministru Transporte no Komunikasaun, Miguel Gonçalves Manetelu, informa, klarifika kontratu ne’ebé nia asina ho Empreza Vorakai ba instalasaun antena Starlink iha sede suku 450 ne’e bazeia ba regra aprovizionamentu la’ós desizaun polítika no família ho kompañia.
Notísia Relevante: DNIK klarifika instala antena Starlink ne’e provizóriu la’ós permanente
Ministru Manetelu hatutan, modalidade aprovizionamentu ne’e iha tolu (3) hanesan, konkursu públiku, konkursu kompeza no konkursu restritu (ajudikasaun) ne’e emerjénsia indika ba kompañia ne’ebé sira fiart iha nesesidade atu halo servisu, tanba Starlink ne’e iha Timor ida de’it no nia mós iha ICP ne’e mak Vorakai, entaun ita loke tan konkursu ba públiku atu halo saida.
“Tanba ne’e, ha’u asina kontratu ho kompañia Vorakai la’ós ho membru Governu sé-sé de’it nia oan. Ne’e la’ós kestaun família ka polítika maibé ne’e direitu husi sidadaun timoroan nian,” Ministru Manetelu klarifika ba jornalista sira iha Palásiu Governu, ohin.
Governante ne’e mós dehan katak konetividade internet ne’e servisu kompeténsia husi MTK nian, la’ós husi Ministériu Administrasaun Estatal, ne’e define loloos iha orgánika Governu Konstitusionál da-sia (9) nian.
“Ami lori internet ba to’o fatin referidu, depois mak kada Ministériu atu utiliza ba saida ne’e kompeténsia sira-nian ona, tanba ema seluk nia uma laran ami la tama,” nia hateten.
Nia esplika, fiu fibra ótika ne’e sei la to’o ba fatin hotu-hotu liuliu área remota, entaun sede suku sira-ne’ebé labele fornese intalasaun fibra ótika ne’e sira atu asesu internet ho saida.
Tanba ne’e mak Governu instala antena Starlink iha suku sira-ne’e, no ida-ne’e mós la’ós sosa sira-nia ekipamentu maibé selu servisu (jasa) kada fulan.
“Entaun área ka suku ne’ebé la instala fibra ótika mak sei tau Starlink, enkuantu hirak ne’ebé monta ona fibra ótika sei la uza tan Starlink,” nia dehan.
Notísia Relevante: DNIK oferese Starlink ba Autoridade RAEOA instala ba sede suku 20 iha Oekusi
Jornalista : Alexandra da Costa
Editór : Cancio Ximenes
