OEKUSI, 16 Abríl 2026 (TATOLI) – Ministériu Transporte no Komunikasaun (MTK) liuhusi Diresaun Nasionál Infraestrutura no Komunikasaun (DNIK) hamutuk ho empreza fornesedór Vorakai Unipesoál Lda, kinta ohin, oferese starlink ba Autoridade Rejiaun Administrativa Espesiál Oekusi Ambeno (RAEOA), hodi instala ba sede suku 20 iha rejiaun Oekusi.
Notísia relevante:Empreza Gardamor no Vorakai sai retallista ofisiál ba servisu internet Starlink iha Timor-Leste
Xefe Departementu Apoia Sekretariadu iha DNIK, Pedro Amaral, esplika, programa ne’e Ministériu Transporte no Komunikasaun (MTK) serbisu hamutuk ho Ministériu Administrasaun Estatál (MAE), atu instala ba suku 20 iha Oekusi hodi apoia serbisu atualizasaun dadus ba Sistema Integradu Informasaun Jestaun Suku no Aldeia (SIIGSA) iha suku idak-idak.
“Suku 20 mak sei instala maibé ekipa sei suluk ba suku 18 faze tuirmai mak kompleta tan ba suku rua seluk,
Dirijente ne’e esplika, diferensia starlink ne’e koneksaun direita ba satellite, tanba Oekusi seidauk hetan koneksaun direita husi fibra óptika, entaun suku sira-ne’ebé izoladu, ladun asesu era dijitalizasaun, entaun ida-ne’e oportunidade atu sira mós bele partilla sira-nia informasaun no atividade liuhusi SIIGSA.
“Ne’ebé, ita rekomenda autoridade RAEOA atu kontinua akompaña hodi aproveita utiliza ho di’ak, nune’e bele responde direita nesesidade públiku iha kada suku ida-idak,” nia afirma.
Notísia relevante:Empreza Vorakai sai retallista ofisiál ba servisu internét Starlink iha Timor-Leste
Diretór Diresaun Rejionál Administrasaun, José Tanesib Anunu, reprezenta Autoridade RAEOA, konsidera ho instalasaun starlink iha sede suku, responde ona preokupasaun autoridade lokál hodi fasilita atualiza dadús populasaun ba sistema SIIGSA.
“Agradese tebes, bem-vindu starlink mai iha suku hothotu iha Oekusi, durante ne’e ita-nia preokupasaun, maibé hahú ohin ita-bele rezolve ona ita-nia preokupasaun ba liña internet, tanba suku sira iha database prienxe online iha suku sira uza de’it pulsa, difikulta tebes prosesu imput data, entaun ohin starlink iha ona, ita hein katak sei ajuda tebes serbisu suku sira ho laís liu, tanba tuir dadus sei iha uma-kain rihun 10 mak seidauk atualiza ba sistema SIIGSA ne’e,” nia orgullu.
Notísia relevante:Governu Austrália oferese rede STARLINK ba INFORDEPE hasa’e kualidade formasaun inovativa teknolojia
Entretantu, tuir observasaun Jornalista Ajénsi Tatoli,I.P, iha loron dahuluk ne’e, ekipa tékniku husi DNIK hamutuk ho kompañia Vorakai Unipesoál Lda, hahú instala ona iha suku Nípani sub-rejiaun Pante Makasar.
Jornalista: Abílio Elo Nini
Editór: Rafael Ximenes de A. Belo
