DILI, 27 Maiu 2025 (TATOLI)—Empreza Gardamor no Vorakai Unipessoal Lda sai nu’udar retallista (resellers) ka revendedór ofisiál Starlink nian ba servisu internet satelite revolusionáriu Space Exploration Technologies Corporation (SpaceX) hodi hadi’a konetividade dijitál iha Timor-Leste.
Prezidente Autoridade Nasionál Komunikasaun (ANC, sigla portugés), Flávio Cardoso Neves, haktuir, antes retalista Starlink eziste, Starlink halo uluk teste durante fulan-tolu no hatama sira-nia pedidu atu investe, tanba ne’e iha loron 20 Agostu sira hetan sertifikasaun hodi rekoñesidu hanesan Internet Service Provider (ISP) ida no iha loron 04 Dezembru 2024 sira ofisialmente hetan lisensa jerál espektru atu halo operasaun iha Timor-Leste.
“Iha tempu ne’ebá ita halo diskusaun kona-ba legál no mekanizmu administrasaun atu sira bele priense hodi hahú halo operasaun. Iha semana kotuk, reprezentante SpaceX mai hahú iha loron 11 to’o 15 Maiu, ita konsege halo diskusaun tékniku ne’ebé kle’an, ne’ebé sira fó autorizasaun ba ISP rua hanesan Guardamor no Vorakai sai hanesan retallista ba ekipamentu Starlink iha Timor-Leste,” Prezidente Autoridade hateten iha salaun ANC, Kolmera, Tersa ne’e.
Notísia relvante : Empreza Vorakai sai retallista ofisiál ba servisu internét Starlink iha Timor-Leste
Nia dehan, Starlink presiza iha retallista iha Timor-Leste tanba durante ne’e ema barak fa’an ekipmentu Starlink.
“Agora resellers iha ona bele ajuda ANC kontrola no di’ak liután mak sira bele halo oprasaun iha Timor-Leste, tanba prezensa Starlink ho kabu fibra ótika ne’e halo mudansa boot ba telekomunikasaun. Papél ANC mak atu regula teknolojia rua ne’e nia benefísiu ne’e di’ak ba ita-nia populasaun atubele aselera dezenvolvimentu nasionál,” nia akresenta.
Iha biban ne’e, nia parte husu ba ema sira ne’ebé fa’an ekipamentu Starlink iha Timor tenke koordena ho retallista rua nune’e bele kontrola.
“Ha’u husu ba maluk sira ne’ebé fa’an ekipamentu Starlink posibilidade imi halo koordenasaun ho retallista rua ne’e hatama sasán sira ne’ebé orijinál, no tenke hetan lisensa mak hala’o atividade sira,” Prezidente ANC fó hanoin.
Flávio Cardoso Neves, dehan, ezisténsia kabu fibra ótika no Starlink laiha emeasa ba malu maibé kompleta malu hodi aselera dezenvolvimentu.
Antes ne’e, iha Abríl 2025 empreza Vorakai deklara katak ofisilamente sai retallista ba Starlink iha Timor-Leste.
Jornalista : Arminda Fonseca
Editora : Julia Caharina
