DILI, 14 Maiu 2026 (TATOLI)-Vise-Ministru ba Asuntu Parlamentár, Adérito Hugo da Costa, lamenta ho asaun brutalizmu liga ho kazu sobu festa ida iha área Akanunu, aldeia Halidolar, postu administrativu Kristu Rei, munisípiu Dili, iha sábadu foin lalais, pur volta tuku 05h00 madrugada no kazu omisídiu iha aldeia Poros, suku Mehara, postu Tutuala, munisípiu Lautein, ne’ebé rezulta ema ida mate.
“Iha Hera, Akanunu, ema hotu asiste vídeo virál. Tenke haree prosesu kle’an ba autór sira, hodi haree tendénsia saida mak akontesimentu brutál tebes iha festa. Tuir loloos ema ba kontente [maibé] akontese atake brutál tebetebes. Ita la imajina país ida tinan 24 hanesan soberanu ne’e, sei iha nafatin grupu ou indivídu ne’ebé ho hanoin destroe”, nia hato’o iha Parlamentu Nasionál, ohin.
Aleinde ne’e, nia mós preokupa ho akontesimentu kazu omisídiu iha aldeia Poros, suku Mehara, postu administrativu Tutuala, munisípiu Lautein, foin lalais ne’e.
Nia husu ba entidade kompetente atu halo investigasaun kle’an, tenke deteta motivu loloos iha akontesimentu sira ne’e hodi sai referénsia ba medida prevensaun másima husi autoridade seguransa hodi lori mensajen ba populasaun hotu atu sente seguru. Nia sujere atu prosesa autór sira tuir dalan legál ne’ebé iha.
“Orientasaun Primeiru-Ministru ba Komandu PNTL no Ministériu Interiór atu haree akontesimentu ne’e, medida prevensaun ba oin no prosesa autór sira”, nia dehan.
Governante ne’e apela ba sidadaun hotu atu kontribui ba kria situasaun hakmatek iha rai-laran.
Notísia relevante: Komandu F-FDTL sei foti medida hasoru oknum suspeitadu ba kazu omisídiu Poros
Lembra katak Polísia Nasionál Timor-Leste (PNTL) detein ona autór na’in-12 liga ho kazu sobu iha festa ida iha área Akanunu hodi submete ba investigasaun.
Kazu asaltu malu entre grupu rua ne’e rezulta ema na’in-rua hetan kanek kmaan, uma tolu hetan danus, motór, kadeira, meza, inklui mós ekipamentu múzika toka festa nian hanesan órgaun, koluna no sasán seluk tan hetan estragu.
Lembra katak, iha 13 Maiu, Governu liuhusi reuniaun Konsellu Ministru aprova Projetu Rezolusaun Governu kona-ba medida sira atu hametin seguransa públika no prevene violénsia. Desizaun ida-ne’e mosu hafoin insidente violénsia sira-ne’ebé rejista iha semana hirak ikus ne’e iha fatin oioin iha nasaun ne’e, ne’ebé envolve grupu joven sira no ho konsekuénsia maka’as ba integridade fízika sidadaun sira-nian, ba propriedade privada nomós ba estabilidade husi komunidade ne’ebé afetada.
Nune’e, insidente sira-ne’e sai grave liu iha loron 10 fulan-Maiu iha Mehara, Lautein, ne’ebé konfrontu ida envolve grupu joven sira-ne’ebé bele halo sidadaun ida mate.
Notísia relevante: PNTL detein suspeitu na’in-12 ba kazu “sobu” festa iha Hera Akanunu
Jornalista: Nelson de Sousa
Editora: Maria Auxiliadora
