BAUKAU, 15 Maiu 2026 (TATOLI)—Asidente Tráfegu ne’ebé akontese iha área Madoma, Aldeia Betulale, Suku Vemasse Tasi, Postu Administrativu Vemasse, Munisípiu Baukau, rezulta Inácia dos Santos Soares lakon vida, entretantu, Komandu Polísia Nasionál Timor-Leste (PNTL) Munisípiu Baukau kontinua prosesa kazu ne’e.
Tuir kronolojia, karreta marka Prado ho númeru matríkula 05.469 G ne’ebé kondús husi suspeitu ho inisiál VG husi diresaun Baukau bá Dili ho velosidade másima, iha-ne’ebé hamosu asidente purvolta lorokraik tuku 17:00 Otl, iha Kinta (14/05/2026).
“Karreta ne’e ho velosidade aas derepente tarutu ha’u haree matebian iha tiha karreta leten,” sasin no família matebian, Sancho Faria Freitas hateten iha Ospitál Rejionál Eduardo Ximenes (HoREX, sigla portugeza) Vila Nova, Sesta ne’e.
Sancho Freitas haktuir vítima lakon vida iha fatin akontesementu tanba pankada iha ulun no aleinde ne’e Belina Faria ho idade 17 hetan kanek kauza husi espellu karreta baku iha ulun, enkuantu Livánia Faria (17) salva an husi asidente maibé dezmaia tanba kondisaun trauma.
Vítima na’in-tolu nu’udár estudante iha Eskola Ensinu Sekundária Públika (ESP) Postu Administrativu Vemasse, ne’ebé antes asidente hein tum-tum atu ba treina drum band relasiona ho isár bandeira ba selebrasaun Loron Restaurasaun Independénsia RDTL ba da-24, iha ESP Vemasse Vila.
Hafoin asidente, parte família dezloka vítima na’in-tolu ba ospitál hanesan matebian Inácia Soares no Livánia Faria iha Sentru Saúde Vemasse, enkuantu vítima Belina Faria kontinua halo tratamentu kanek iha HoREX. Atualmente, vítima sira seluk iha ona faze rekuperasaun.
Entretantu, Komandu Polísia Nasionál Timor-Leste (PNTL) Munisípiu Baukau hala’o ona identifikasaun no asegura ona suspeitu ho inisiál VG (51), profisaun nu’udár motorista iha Ministériu Agrikultura, Peska, Pekuária no Floresta (MAPPF), iha-ne’ebé rejistu ho númeru 0046/26 BeSTR.
PNTL kontinua prosesa asidente iha Vemasse
Komandu Polísia Nasionál Timor-Leste (PNTL) Munisípiu Baukau liuhusi prosesu identifikasaun deside kontinua prosesa kazu asidente tráfegu iha área Madoma ne’e.
Komandante Polísia Nasionál Timor-Leste (PNTL) Munisípiu Baukau, Superintendente João Sancho Pires, esplika hafoin asindente referidu akontese, parte PNTL liuhusi Seksaun Tránzitu Eskuadra Vemasse direta ba lokál akontesimentu hodi asegura suspeitu, rekolla informasaun inklui evakua evidénsia no vitíma ba ospitál.
“Ita nafatin loke kazu ne’e prosesa bá-oin no seluk halo negosiasaun ba malu liuhusi dalan família no ita hein rezultadu,” Superintendente João Sancho Pires hateten iha ninia kna’ar fatin, Vila Nova, Sesta ne’e.
Superintendente Pires relata PNTL halo ona identifikasaun ba suspeitu ho insiál VG nu’udár kondutór no deside kontinua loke kazu referidu ba prosesa iha Ministériu Públiku ho numéru kazu 0043/26 BeSTR, mezmu parte rua halo ona mediasaun ne’ebé konkorda atu hamutuk haloot vítima no sei rezolve liuhosi dalan família.
Aleinde ne’e, suspeitu konsege asegura an iha Eskuadra Polísia Laleia, Munisípiu Manututo antes transporta fali ba Vemasse no atualmente asegura hela iha Komandu Polísia Munisípiu Baukau hodi hein investigasaun.
Liuhusi rekollamentu informasaun ne’ebé iha, suspeitu suspeitadu kolen tanba viajen ho distánsia dook hafoin fila husi lokál serbisu iha Uatulari, Munisípiu Vikeke, hamutuk ho pasajeiru na’in-tolu kompostu husi asesór, xefe gabinete inklui funsionáriu ida atu bá Dili.
Iha fatin hanesan, suspeitu VG rekoñese hamosu asidente referidu no laiha intensaun atu hamosu asidente inklui prontu toma responsabilidade ba kazu ne’e.
“Ida-ne’e ba dahuluk akontese iha ha’u-nia moris, sente triste tebes. Ha’u mós iha família. Sé mak hakarak lakon nia ema? Ha’u mós laiha planu atu akontese hanesan ne’e. Parte ida ha’u simu tanba ha’u mak lori karreta,” VG hateten.
Nia konfesa, antes ne’e hamutuk ho ekipa tuir dalan ba Dili hafoin ramata partisipa fúnebre Ministru Agrikultura, Marcos da Cruz nia inan no lori dokumentu ba asina iha Uatulari, Munisípiu Vikeke, maibé ikusmai espontaniamente enfrenta asidente iha Vemasse.
Motorista ne’e konta, bainhira dezloka husi Vikeke hamutuk karreta tolu, tuir dalan sente kondisaun di’ak no deskansa dahuluk iha área Vikeke no Kaisidu, Suku Tirilolo, Baukau Vila antes mosu asidente iha Vemasse.
Jornalista: Natalino Belo
Editór: Xisto Freitas da Piedade
