DILI, 18 Maiu 2026 (TATOLI)—Diretór Servisu Apoiu Diagnóstiku no Terapeutiku iha HNGV, Vidal de Jesus Lopes, informa HNGV halo kordenasaun ho Ministériu Saúde no Komisaun Funsaun Públika, posibilidade atu rekruta profisionál saúde sai funsionáriu permanente servisu iha edifísiu pediatria andar lima iha HNGV.
Notísia Relevante: HNGV sei rekruta profisionál saúde 400-resin servisu iha edifísiu pediatria andar lima
“Kona-ba prosesu rekrutamentu tempu badak Hospitál Nasionál Guido Valadares sei establese komisaun ida hala’o prosesu rekrutamentu hodi prienxe iha ospitál andar lima ne’ebé mak tempu badak empreza entrega mai Hospitál Nasionál Guido Valadares, tanba orsamentu ba prosesu ne’e aprova ona no presiza ezekuta lalais. Kona-ba montante ne’e hira mak ha’u ladún lembra maibé orsamentu iha ona,” Diretór Vidal de Jesus Lopes hateten ba jornalista sira iha nia kna’ar fatin HNGV, Bidau Tokoh Baru, ohin.
Nia relata, profisionál Saúde sira-ne’ebé mak Hospoitál Nasionál Guido Valadares atu halo rekrutamentu mak hamutuk 400 maibé depende ba nesidade servisu ospitál nian.
“Númeru ba profisionál saúde ne’ebé sei rekruta bele to’o 300 ka 400, maibé depende ba nesesidade servisu iha ospitál nia laran. Tanba ne’e, HNGV sei forma ekipa espesífika ida atu jere prosesu rekrutamentu ne’e. La’ós HNGV de’it maibé sei halo koordenasaun hamutuk ho Komisaun Funsaun Públiku no Ministériu Saúde. Iha posibilidade katak kandidatu sira-ne’ebé pasa prosesu rekrutamentu bele sai funsionáriu públiku tuir regra no mekanizmu Governu nian,” nia dehan.
Antes ne’e, Diretór Ezekutivu Hospitál Nasionál Guido Valadares, Nuno Vital Soares, hateten haree kontrusaun edifisiu pediatria andar lima ne’ebé mak daudaun atinje ona 85%, mak tempu badak Hospoitál Nasionál Guido Valadares sei halo rekrutamentu ba profisonál saúde no tékniku aliadu sira, nune’e bele prienxe ba ospitál pediatria andar lima ne’e.
“Tempu badak HNGV ita prepara halo rekrutamentu tan ba profisionál saúde sira atu apoiu iha área rekursu umanu nian, liuliu iha área infermajen, médiku jerál, tékniku aliadu no parte ne’ebé mak nesesáriu sira,” Nuno Vital esplika.
Nia afirma, tuir Hospoitál Nasionál Guido Valadares nia alvu ne’e sei halo rekrutamentu profisionál saúde hamutuk 400-resin ne’ebé mak atu mai apoiu servisu atendimentu nian iha HNGV.
Jornalista : Felicidade Ximenes
Editór : Cancio Ximenes
