DILI, 20 Maiu 2026 (TATOLI)—Eis Prezidente Repúblika, Taur Matan Ruak, hateten iha Selebrasaun Restaurasaun Independénsia ba da-XXIV (20 Maiu 2002-20 Maiu 2026) hamutuk hakeke ba Timor-Leste nia moris di’ak.
“Ohin, selebra tinan 24 Restaurasaun Independénsia RDTL marka ida-ne’ebé kle’an tebes iha ita-nia istória. Tinan 24 ona ita harii ita-nia Estadu nu’udár nasaun soberana, durasaun ne’ebé lori ita atu hanoin hikas fali ba tinan 24 ita-nia luta naruk nian ba auto-determinasaun. Harii Estadu la’ós kna’ar ne’ebé fásil maibé mós la difisil, se ita hotu-hotu tula dikur ba malu. Iha jornada tinan ruanulu-resin haat ne’e, ita hakat boot ona, maibé mós ita hasoru dezafiu lubuk, ne’ebé ezije timoroan hotu nia aten-brani. Ho konstelasaun foun iha mundu ohin loron, ezije ita atu sai forte liután, hodi hamriik metin iha ita-nia rain ne’ebé sei iha prosesu konsolidasaun nia laran,” Taur Matan Ruak dehan iha nota ne’ebé TATOLI asesu, Kuarta ne’e.
Prezidente PLP Taur Matan Ruak ne’e mós dehan fundamentu hosi independénsia mak povu.
“Objetivu fundamentál husi ita-nia independénsia mak povu nia moris di’ak ne’ebé mak sai sasukat úniku ba ita-nia susesu nu’udár nasaun ida, tanba ne’e, iha okaziaun osan-mean ida ne’e, ha’u hato’o apelu ho fuan ba líder sira no sidadaun hotu, katak unifika vizaun, hametin unidade no serbisu hamutuk,” Taur Matan Ruak tenik.
Taur esplika unifika vizaun katak tempu ona atu tau interese nasionál iha fatin ne’ebé aas liu, husik hotu-hotu nia ego privadu no interese grupu nian hodi foku ba interese komún nian.
“Atu hametin unidade, agora la tempu ona ita sukat sé mak halo liu ka sé mak halo uitoan liu ba rai ida-ne’e. Nasaun ne’e ita hotu nian. Ukun-an ne’e ita hotu mak na’in no dezenvolvimentu ne’e tenke pro povu no respeita povu no konsidera povu hanesan na’in,” Eis Prezidente Repúblika subliña.
Líder Nasionál ne’e mós hateten presiza hotu-hotu nia kontribuisaun no serbisu hamutuk lori dezenvolvimentu nasionál mai nasaun referida.
“Ho fuan no hanoin ida de’it, mai ita hamutuk dudu ró-boot ida naran Timor-Leste bá-oin ho esperansa foun, hodi harii moris ida dignu no prósperu ba ita-nia povu. Povu mak ita-nia naroman. Povu mak ita-nia na’i. Ita-nia servisu mak atu serbí sira, la’ós atu ukun sira,” Taur Matan Ruak informa.
Jornalista: Osória Marques
Editór: Xisto Freitas da Piedade
