DILI, 20 Maiu 2026 (TATOLI)—Diretór Jerál Sekretáriu Tékniku Administrasaun Eleitorál (STAE), Elveiro Fernandes Moniz, informa STAE halo atendimentu públiku ba atividade Resenseamentu Eleitorál no Atualizasaun Baze Dadus (RE-ABD) biométriku hahú fulan-Jullu 2024 to’o agora STAE atribui ona kartaun hamutuk 352.710.
Hosi númeru ne’e, kompostu husi eleitór foun hamutuk 44.255 no atualizasaun dadus biométriku hamutuk 308.455, ne’ebé agrupa ba Munisípiu Aileu 18.853, Ainaru 21.232, Ataúru 4.315, Baukau 43.539, Bobonaru 26.864, Kovalima 20.993, Dili 77.713, Ermera 21.634, Lautein 23.632, Likisá 19.615, Manatutu 20.905, Manufahi 15.837, Oekusi 18.025 no Vikeke 19.553.
Husi atinjementu ne’e signifika katak sei falta eleitór hamutuk 617.574 ka 66.68% maka seidauk atualizadu, husi totál eleitór ne’ebé rejistadu iha baze dadus STAE hamutuk 970.284.
“Estoke Blanko ID sei iha maibé Tonner Ribbon no Trensfer Film maka estoke hotu, no agora daudaun prosesu aprovizionamentu ba akizisaun blanku ID no Toner Ribbon ne’e re-transfer film iha ona faze finál no espera katak iha Jullu materiál hirak-ne’e disponibilizadu,” nia dehan ba TATOLI iha Tasi-Tolu, Kuarta ne’e.
Nia subliña iha tinan 2025 STAE hetan alokasaun orsamentu $1.966.746 ho nia deskrisaun saláriu vensimentu $1.045.051, bens no servisu $899.548, kapitál menór $22.147. Orsamentu ba akizisaun materiál blanku ID (200.000 blanku ID), Tonner- Ribbon HDP (unidade 500) no re-transfer HDP (unidade 66) aloka iha bens servisu ho totál orsamentu hamutuk $245.780.
Kuantidade blanku ID, Tonner-Ribbon HDP no transfer HDP ne’ebé temi iha leten labele responde entusiazmu eleitór hirak-ne’ebé atu resensea ka renova sira-nia dadus husi semi biométriku ba biométriku hodi hamosu stock out.
Nia subliña tan, situasaun ida-ne’e obriga STAE tenke halo viroment husi balansu iha bens no servisu ne’ebé STAE iha hodi halo tan akizisaun ba materiál hirak-ne’e atubele fasilita ezijénsia iha sentru atendimentu sira. Estoke blanku ID, Tonner-Ribbon HDP no re-transfer HDP ne’ebé nia akizisaun hala’o iha tinan 2025 maka STAE utiliza hodi responde ba atendimentu hirak-ne’ebé realiza iha fulan-Janeiru to’o meiadu fulan-Fevereiru 2026.
Nune’e, iha fulan Marsu 2026, STAE tenke halo adenda kontratu 30% ho kompañia fornesedór blanku ID, Tonner-Ribbon HDP no re-transfer film husi valór kontratu orijinál, nune’e bele responde ba ezijénsia iha sentru atendimentu sira. Mezmu nune’e, nafatin labele responde hotu ezijénsia sira-ne’e.
Diretór Jerál STAE haktuir iha 2026 STAE sei halo akizisaun ba blanku ID 680.000, Tonner Ribbon hamutuk unidade 2.720 no re-transfer film unidade 453. Orsamentu ne’ebé aloka hodi halo akizisaun ba materiál hirak-ne’e hamutuk $933.825. Prosesu aprovizionamentu ba akizisaun materiál hirak-ne’e iha ona faze finál no iha fulan-Jullu 2026 materiál sira-ne’e sei disponibilizadu.
Husu kona-ba kartaun biométriku ne’e sei utiliza iha eleisaun tinan oin, responsavel hateten, loos, maibé kona-ba nia mekanizmu sei regula iha dekretu-Governu.
Portantu, tuir planu, iha fulan-Jullu 2026 to’o Janeiru 2027, STAE sei estabelese sentru atendimentu RE-ABD iha postu administrativu hamutuk 60 inklui Autoridade Administrativa Ataúru no diáspora hamutuk hitu, hodi halo atendimentu públiku ba sidadaun sira.
Jornalista: Osória Marques
Editór: Xisto Freitas da Piedade
