DILI, 21 Maiu 2026 (TATOLI)—Ministru Obra Públika, Samuel Marçal, klarifika katak Governu la fó prioridade atu halo investimentu bee no enérjia eletrisidade ba projetu Pelican Paradise, tanba tuir avaliasaun katak durante ne’e kompañia lahalo atividade konstrusaun ruma iha terrenu.
Notísia Relevante: Pelican Paradise seidauk hamamuk fatin projetu Tíbar
Ministru Samuel Marçal hateten, bainhira nia hetan pose hanesan Ministru Obra Públika, nia hetan informasaun dehan nune’e no kompañia mós mai atu monta enérjia eletrisidade no bee-moos.
“Entaun ha’u ba haree enérjia eletrisidade monta tiha ona, ne’ebé durante ne’e kompañia uza. Imi bele ba haree rasik, monta ona trafo ida iha ne’ebá maibé kompañia hakarak husu trafo boot liu, maibé laiha atividade konstrusaun ida iha ne’ebá. Entaun, ita atu investe estraga enérjia iha ne’ebá hodi halo saida. Laiha atividade konstrusaun, ita investe ahi no bee ba Pelican Paradise ne’e atu halo saida,” Ministru Samuel informa ba jornalista iha nia kna’ar fatin Kaikoli, ohin.
Enkuantu, nia hatutan, kona-ba bee-moos ne’e sira identifika tiha ona atu halo perfurasaun, maibé dada bee ba saida mak iha ne’ebá, pelumenus kompaña hatudu sira-nia atividade ruma ka halo netik aliserse ruma mós lae.
“Ida-ne’e la sai kestaun. Ha’u haree ida-ne’e la’ós sai razaun tanba buat ida dada ahi no perfurasaun bee ne’e la defisíl ida. Kompañia ezije ne’e loos maibé laiha atividade konstrusaun ita ba investe ahi no bee atu halo saida,” Governante ne’e afirma.
Entretantu, dezde Janeiru 2025, Pelican Paradise buka hela apoiu Governu nian iha forma depózitu millaun $180 ho funan anuál 4% hodi garante fornesimentu bee, eletrisidade no lisensa konstrusaun nian, tuir Akordu Investimentu Espesiál (SIA) ne’ebé asina iha 2022.
Lembra katak Pelican Paradise Group simu ona sertifikadu Deklarasaun Benefísiu tolu ho fundu investimentu inisiál ne’ebé kompostu husi Pelican Ahava, Unip., Lda., millaun $90, Pelican Elior Unip. Lda., millaun $110 no Rezerva Pelican Adara millaun $1.
Projetu ne’e tuir planu fó empregu ba ema na’in-1.500 durante konstrusaun no traballadór permanente na’in-1.300 hafoin konstrusaun no reflorestasaun ba área ne’e. Valór investimentu totál husi projetu ne’e kalkula besik millaun $700.
Notísia Relevante: Governu fó tempu loron 10 ba Pelican Paradise hamamuk fatin
Jornalista : Alexandra da Costa
Editór : Cancio Ximenes
