DILI, 21 Maiu 2026 (TATOLI)—Ministra Saúde, Élia dos Reis Amaral, hateten Governu Konstitusionál da-sia (IX) liuhusi Ministériu Saúde sei esforsu atu hadi’a Sistema iha Timor-Leste.
Notísia Relevante: Prezidente Ramos-Horta relata progresu saúde iha Timor-Leste
“Haree ba progresu setór saúde iha Timor-Leste, agora ita halo esforsu ba servisu setór saúde. Esforsu ne’e ita hahú husi primeiru Governu mai to’o agora, ita agradese ba governasaun sira uluk ne’ebé halo ona servisu liga ba infraestrutura no kapasidade rekursu umanu nian,” Élia dos Reis Amaral hateten ba jornalista sira, ohin.
Nia esplika, esforsu sira-ne’e mak hanesan kuidadu saúde primaria, no mós ba komunidade nia partisipasaun ba iha fasilidade saúde inklui mós populasaun sira-ne’ebé mak iha área rurál.
“Tau postu saúde, sentru saúde hodi haree ba atendimentu ne’ebé mak aproxima, atu nune’e labele difikulta ba iha atendimentu komunidade iha area rurál, tanba dadaun ne’e ita kompleta ona postu saúde 100-resin. Agora sei falta tan postu saúde 40-resin hodi kompleta iha territóriu Timor laran tomak, ne’e ba postu saúde ida-ne’ebé mak atu hahú konstrui bazeia ba populasaun,” nia dehan.
Nia informa, kona-ba sentru saúde kuaze 70-resin kompleta ona no agora oinsá kompleta tan sentru maternidade, tanba ne’e Ministériu Saúde mós presiza define buat rua mak ida mak halo reabilitasaun ba fasilidade saúde sira ida mak konstrui foun ba fasilidade saúde sira.
“Ida atu konstrui foun mak kompleta ho postu saúde no rezidénsia, entaun iha konstrui foun postu saúde 40-resin ne’e, la signifika tinan ida halo hotu kedas ne’e lae, maibé la’o fazeadamente. Antes 2029, bele kompleta fasilidade sira-ne’ebé mak to’o agora seidauk iha ne’e. Tanba, iha sentru maternidade kuaze 12 mak Ajénsia ho Governu halo daudaun, iha balun inaugura ona balu seidauk,” nia dehan.
Jornalista : Felicidade Ximenes
Editór : Cancio Ximenes
