DILI, 21 Maiu 2026 (TATOLI)—Prezidente Repúblika, José Ramos-Horta, kinta ne’e, iha Palásiu Prezidensiál Dili, hasoru malu ho Embaixadór Kanadá, Jess Dutton, hodi diskute kona-ba oinsá atu hakle’an liután relasaun bilaterál no esplora oportunidade komersiál foun sira.
Iha sorumutu ne’e, Embaixadór Dutton hato’o pontu situasaun ba Xefe Estadu kona-ba atividade husi delegasaun komersiál nivel-aas husi Kanadá ne’ebé daudaun ne’e vizita Timor-Leste, ne’ebé inklui reprezentante sira husi Banku Nasionál Kanadá (National Bank of Canada), BlackBerry, no Konsellu Emprezariál Kanadá-ASEAN.
“Diskusaun sira destaka dalan sira-ne’ebé promete ba investimentu husi setór privadu no parseria estratéjika sira-ne’ebé aliña ho objetivu dezenvolvimentu nasionál Timor-Leste nian,” Embaixadór ne’e hateten hafoin ramata enkontru ho Xefe Estadu.
Hodi reafirma kompromisu Kanadá nian ba kreximentu sustentável nasaun nian, Embaixadór Dutton destaka kontribuisaun finansiamentu konsesionál husi Kanadá ho valór millaun $15, ne’ebé fasilita liuhusi Banku Dezenvolvimentu Aziátiku (ADB), ba konstrusaun parke solár foun ida.
Alende enerjia verde no programa reziliénsia klimátika sira, enkontru ne’e mós esplora poténsia ba kooperasaun iha setór mina-rai, gás no estrasaun.
Inisiativa sira-ne’e espera atu apoia maka’as vizaun Prezidente nian hodi kria kampu traballu lokál no impulsiona kreximentu ekonómiku ne’ebé forte.
Enkontru diplomátiku ne’e remata ho reflesaun kona-ba relasaun istóriku ne’ebé kle’an entre nasaun rua ne’e, ne’ebé koinsidi ho selebrasaun Loron Restaurasaun Independénsia Timor-Leste ba dala 24.
Embaixadór ne’e rekoinese, Prezidente Ramos-Horta hanesan estadista globál, relembra hanoin-hetan fali apoiu fundamentál Kanadá nian ba Timor-Leste, liu-liu deslokasaun pesoál forsa armadas Kanadá liu na’in-600 ba misaun ne’ebé mandatu husi ONU iha tinan 24 liubá, ne’ebé subliña legadu husi amizade duradouru no respeitu mútuu.
Jornalista : Hortêncio Sanchez
Editór : Cancio Ximenes
