BAUKAU, 22 Maiu 2026 (TATOLI)—Governu liuhusi Sekretaria Estadu Asuntu Toponímia Organizasaun Urbana (SEATOU) husu komunidade afetada atu koopera relasiona ho projetu reabilitasaun estrada urbana iha Munisípiu Baukau.
Sekretáriu Estadu Asuntu Toponímia Organizasaun Urbana (SEATOU), Germano Santa Brites, rekoñese hafoin lansamentu ba projetu referidu seidauk hala’o diálogu ho komunidade afetada liuliu sosializa kona-ba obrigasaun Estadu ligadu ho direitu komunidade ne’ebé afetada husi alargamentu estrada urbana Baukau Vila.
“Seidauk sobu la’ós katak sira lakohi. Falta ami-nia obrigasaun mai fahé informasaun ba sira para depois komprende halo didi’ak nune’e bele koopera ho Estadu mak depoiz ita sobu,” Germano Brites hateten bainhira hala’o diálogu ho komunidade afetada iha Salaun Apuramentu Administrasaun Munisipál Vila Nova, Sesta ne’e.
Governante ne’e relata ekipa konjunta identifika no marka ona sinál ba uma ne’ebé afetadu maibe falta informasaun kona-ba indemnizasaun nune’e atuál komunidade seidauk sobu mezmu kompañia hahú ona projetu.
Germano kompromete sei hala’o koodenasaun hodi haree asuntu indemnizasaun ba komunidade ne’ebé hetan afetada husi projetu reabilitasaun estrada urbana nune’e komunidade bele muda husi alargamentu estrada ne’ebé sei kobre ba pista rua ho largura metru 22.
“Ohin ita hamutuk iha-ne’e atu rona didi’ak informasaun sira kona-ba direitu ema idaidak nian,” Germano Brites akresenta.
Iha fatin hanesan, Prezidente Autoridade Munisipál Baucau, Veneranda Lemos Martins hateten ho diálogu entre Governu no komunidade nu’udár maneira pozitiva nune’e dezenvolvimentu ne’ebé iha labele afeta ba sidadaun liuliu haree ba justisa no direitu ema ninian.
“Ha’u espera liuhusi diálogu ida-ne’e bele motiva ita hotu atubele kontibui ba estrada nune’e bele sai hanesan legadu ba aban bairua,” Veneranda Lemos hateten.
Nia enkoraja komunidade afetada sira atu hato’o preokupasaun hotu ho maneira diálogu nune’e bele kontribui tanba dezenvolvimentu nu’udár devér Estadu no devér Governu atu lori dezenvolvimentu ba interese komún.
Tuir dadus husi ekipa konjunta lideradu husi Ministériu Obra Públika (MOP) identifika uma hamutuk 55 mak afetadu kompostu estrada pakote dahuluk diresaun Nagardjo to’o rotunda Vila Nova hamutuk uma 24 no pakote daruak totál uma ne’ebé afetadu hamutuk 31.
Entretantu, estrada urbana iha Baukau vila atuál iha faze implementasaun responsavel husi kompañia JOVA Construction Unipessoal, Lda responsabiliza pakote dahuluk ho valór orsamentu $4.735.021,55 no pakote daruak responsabiliza husi Kompañia Vage’e Unipessoal, Lda ho valór orsamentu $3.768.933,21 ho durasaun serbisu tinan-rua.
Jornalista: Natalino Belo
Editór: Xisto Freitas da Piedade
