DILI, 03 Juñu 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu Rezolusaun Governu ne’ebé aprezenta husi Ministru Interiór, Francisco da Costa Guterres, kona-ba definisaun nesesidade anuál husi pesoál ne’ebé sei rekruta ba Polísia Nasionál Timor-Leste (PNTL) iha tinan 2026.
Tuir Ministru Interiór, Francisco da Costa Guterres, hateten husi kadete foun na’in-400 ne’e sei aumenta. Rekrutamentu sei iha tempu badak, loloos ne’e iha fulan-Maiu ne’e maibé presiza fali instrumentu legál ida.
“Nune’e ohin mós aprova ona instrumentu legál ida ba prosesu kontinuasaun hodi aumenta tan 750. Entaun, prosesu agora hahú la’o ona. Fulan-Juñu nia laran ne’e sekretáriadu sira monta hotu ona no ita fó semana rua atu sira reuniaun hodi komunika ba kraik,” Ministru Interiór ne’e informa ba jornalista sira iha Palásiu Governu.
Ministru ne’e dehan, ekipa juri sira forma hotu ona, sekretáriadu iha hotu ona, inklui komisaun fiskalizasaun no monitorizasaun mós iha hotu ona, ne’ebé hein katak ho instrumentu legál ida ohin aprova ne’e, prosesu rekrutamentu bele la’o ho di’ak.
“Ekipa juri sira-ne’e kompostu husi ema internasionál na’in-haat (4), husi nasionál na’in-tolu (3), PNTL na’in-rua (2) ho KFP na’in-ida (1),” nia dehan.
Enkuantu tezolusaun Governu nian estabelese ba 350 númeru vaga adisionál ne’ebé sei rekruta husi PNTL iha tinan 2026, ne’ebé aumenta ba vaga 400 ne’ebé antes ne’e aprova ona ba admisaun iha Kursu Formasaun Ajente, hodi aumenta totál vaga 750.
Husi vaga sira-ne’ebé prevee ona, 400 destina ba polisiamentu jerál ne’ebé asegura husi Komandu Munisipál sira no 350 ba reforsu Unidade Espesializada no Rezerva PNTL nian, mak hanesan Unidade Polísia Marítima, Unidade Patrullamentu Fronteira no Unidade Espesiál Polísia.
Nune’e, medida ida-ne’e ho objetivu atu hametin kapasidade operasionál PNTL nian atu hatán ba nesesidade seguransa nasionál, hodi konsidera dezafiu sira ne’ebé relasiona ho prosesu eleitorál sira ne’ebé sei mai, protesaun fronteira no Timor-Leste nia Prezidénsia ba ASEAN iha tinan 2029.
Jornalista : Alexandra da Costa
Editór : Cancio Ximenes
