DILI, 05 Juñu 2026 (TATOLI)—Jerente Restaurante Projetu Montana, Marciana da Silva de Jesus, solisita joven sira iha Loron Mundiál Ambiente ne’ebé selebra kada 05 Maiu, atu garante no prezerva ambiente ne’ebé moos presiza transforma lixu ba obra resiklajen (obras de resiclagem) ne’ebé di’ak.
Nia hatutan, iha loron mundiál ba ambiente ema hotu presiza kuidadu ambiente ho di’ak, konsidera ambiente hanesan iha uma no fatin komun, entaun tenke hamoos se lae bele fó impaktu ba saúde públiku.
“Hakarak ambiente ne’ebé moos ita la presiza sunu de’it foer sira maibé oinsá ho ita-nia kriatividade hodi transforma lixu ba produtu artezenatu ruma (kerajinan tangan),” Jerente Restaurante Projetu Montana, Marciana da Silva de Jesus, hateten ba Agência Tatoli liuhusi telefónika, ohin.
Restaurante Projetu Montana, nia dehan, daudaun ne’e tranforma ona lixu barak ba produtu artezanatu mak hanesan jornál bele tranaforma sai brinku, pasta, bikan ki’ik (pratu) hodi infeita iha uma laran.
Obra seluk, nia haktuir, sira uza surat-tahan uut ne’ebé sira foti husi embaixada sira, entaun sira uza hoban tiha hodi halo sai fali boneka, guardanapu, inklui halo mapa Timor.
“Aleinde produtu artezanatu ami mós transforma tan hena (roupa) aat sira-ne’ebé ema soe ka iha merkadu lauza ona ne’e hodi transforma ba vazu aifunan, tapeti, abientál (roupa tein), karteira, xaveiru (gantungan kunci),” nia dehan.
Nia hatutan, obra seluk tan ne’ebé sira halo durante ne’e iha mós kategória kulinária nian hanesan hudi tasak nia kulit sira bele halo ba bolu no husi hudi kos ne’e sira infeita ba paun no halo raga hodi tau hena iha sira-nia restaurante.
“Buat ne’ebé imposivel ita bele tranforma ba resiklajen furak ida liuliu iha kapitál Dili ne’e sai fatin konsentrasaun ba atividade hotu-hotu, entaun sei prodús lixu barak. Ida-ne’e sai oportunida ba ita atu espresa ita-nia kriatividade ne’ebé iha hodi transforma lixu ba resiklajen ruma,” nia dehan.
Ho nune’e, iha Loron Mundiál Ambiente nian ne’e konsidera la’ós de’it fó hanoin ba sidadaun sira atu hamoos ambiente, maibé mós solisita ema hotu atu promove no tranforma lixeiru ba objetu ida-ne’ebé bele fó benefísiu ba ema.
Entretantu, durante ne’e organizasaun Projetu Montana halo promosaun ona ba sira-nia obra iha Fundasaun Oriente, Pro-ema, Timor Plaza, Otél Timor no iha jardin Faról.
Jornalista : Alexandra da Costa
Editór : Cancio Ximenes
