VIKEKE, 05 Juñu 2026 (TATOLI)—Abitante António Pinto (65), husi Aldeia Aisahe, Suku Bahalarauain, Postu Administrativu Vikeke Vila, Munisípiu Vikeke, lafaek tata-mate (ulun kotu) hafoin soe rede ba bee iha Wee Ai-fuan.
Xefe Suku Bahalaraua’in, Ângelo Laranjinha Pinto, haktuir katak hafoin família sira buka konsege hetan maibé ho kondisaun mate.
“Horisehik (04/06) dadeersan tuku Tuku 6h30 Otl ita-nia komunidade ba buka mak hetan fali vítima, maibé vítima ulun laiha, kelen laiha no liman parte karuk no kabas mós laiha. Nune’e, família sira lori matebian ba nia rezidénsia hodi hala’o prosesu fúnebre,” Xefe Suku Bahalaraua’in ba TATOLI iha Postu Vikeke Vila, Sesta ne’e.
Autoridade ne’e fó hanoin ba komunidade katak iha Suku Bahalaraua’in halo ona tara-bandu ba Wee Ai-fuan, atu ema labele kaer ikan, maibé to’o tempu mak kaer.
“Ita bandu ona atu ema labele kaer ikan iha bee ne’e, maibé ita-nia abitante balun lori rede no balun lori jeradór ba soke ikan. Loloos ne’e labele. Tan ne’e, agora akontese lafaek tata ita halo oinsá,” nia haktuir.
Iha fatin ketak, Komadante Polísia Nasionál Timor Leste (PNTL) Eskuadra Postu Vikeke Vila, Inspetór Xefe Polísia Jacob Amaral, hateten akontesimentu lafaek tata vítima António ne’e nia família mai deklara iha eskuadra PNTL katak lafaek tata nia família.
“Horisehik vítima nia família mak deklara iha eskuadra katak vítima ba buka ikan iha bee ain mak lafaek tata-mate. Tan ne’e, husu komunidade labele besik bee boot tanba agora lafaek barak,” nia tenik.
Jornalista: Vitorino Lopes da Costa
Editór: Xisto Freitas da Piedade
