BAUKAU, 05 Juñu 2026 (TATOLI)—Bispu Dioseze Baukau, Don Leandro Maria Alves konsidera Maktoban Padre Agostinho da Costa nu’udár saserdote ne’ebé fiar ba Maromak no servisu ho responsabilidade.
Bispu Dioseze Baukau, Don Leandro Maria Alves, esplika Padre Agostinho da Costa dedika an nu’udár saserdote durante tinan 55 iha-ne’ebé sai na’in-lulik hodi serbí, hatudu obediénsia no tau-matan ba sarani sira iha Parókia Bekora, Same, Manatutu no Iliomar to’o hakotu-iis asume nu’udár kapelaun iha Ospitál Referál Eduardo Ximenes (HoREX-sigla portugeza) Baukau.
“Amu Agostinho nu’udár saserdote ne’ebé fó sasin, virtude haraik an, simplisidade, obediénsia no fiar metin iha nain Maromak. Iha responsabilidade ne’ebé boot tebes ba fiél, mezmu moras maibé sempre preokupa ho serbisu,” Bispu Dioseze Baukau, Don Leandro Maria Alves hateten bainhira prezide misa funerál ba Padre Agostinho da Costa iha Igreja Pro Katedrál Vila Antiga, Sesta ne’e.
Don Leandro Alves relata maktoban bainhira halo tratamentu iha HoREX hafoin atake iha Novembru 2025 kondisaun rekuperadu ho di’ak, kontente no haksolok, maibé liu deit fulan-ida padre ne’ebé kuiñesidu ho siak hakotu-iis tanba Maromak hadomi.
Lider Katólika ne’e konsidera Padre Agostinho da Costa sarani hotu hatene siak maibé kuandu kuiñese ho klean Maktoban nia siak sinál domin nian ho intensaun fiar ba Maromak tenki lao tuir dalan los liuliu ho responsabilidade, orden ho lolos.
“Buat ne’ebé amu sempre halo mak reza hamutuk ho nia, ida-ne’e sai sasin ezemplu fiar loloos,” Don Leandro Alves akresenta.
Notísia relevante: Aban, sei haloot Padre Agostinho da Costa iha semitériu dioseze
Bispu informa sarani hotu triste tanba lakon saserdote seniór ne’ebé sempre halibur na’i-lulik sira ho kontente, sai inspiradór moris nu’udár padre, firme iha vida saserdotál, forte iha pastorál ho domin ne’ebé boot ba sarani no nasaun Timor-Leste.
Mezmu nune’e, nu’udár sarani labele lakon esperansa ba moris rohan laek nian tanba Jesús hateten ema-ne’ebé han Ha’u-isin no hemu Ha’u-nia ran hetan moris ba nafatin, Ha’u sei halo moris hias iha loron ikus, ho sentidu katak Padre Agostinho agora hamutuk ho Maromak iha lalehan no fiar katak hamutuk ho Maromak nafatin tau-matan ba sarani sira iha mundu.
Iha fatin hanesan, reprezentante família, Padre Adérito Victor, SDB, hato’o deskulpa ba sarani sira hotu tanba Maktoban koñesidu ho siak no hato’o agradese ba entidade hotu Prezidente Repúblika, Governu, pesoál saúde, veteranu, Bispu na’in-tolu, Padre, Madre no sarani hotu ne’ebé apoia tantu direta no indireta durante fó ba Padre Agostinho da Costa to’o hakotu vida iha mundu.
“Hodi maktoban nia naran, ami família husu deskulpa no perdaun ba sarani sira. Ami-nia aman ne’e siak-teen maibé siak osan mean,” Padre Adérito Victor haktuir.
Entretantu, misa funerál Padre Agostinho da Costa prezide husi Bispu Dioseze Baukau, Don Leandro Maria Alves no akompaña husi Bispu Dioseze Dili, Don Virgílio Cardeál do Carmo da Silva, SDB no Bispu Dioseze Maliana, Don Norberto do Amarál hamutuk ho kleru, relijiozu, família no sarani Dioseze Baukau.
Kadaver Maktoban Padre Agostinho da Costa rasik hafoin ramata misa, translada husi Igreja Pro Katedrál Vila Antiga b’a haloot iha semitériu dioseze iha Parókia Sagradu Korasaun de Jesus Vila Nova, Tirilolo, Baukau Vila.
Jornalista: Natalino Belo
Editór: Xisto Freitas da Piedade
