OEKUSI, 05 Juñu 2026 (TATOLI) – Ministru Obra Públika (MOP), Samuel Marçal, atuál Prezidente Konsellu Administrasaun Fundu Espesiál Dezenvolvimentu (KAFED), rekomenda ba Serbisu Rejionál Obra Públika Rejiaun Administrativa Espesiál Oekusi Ambeno (RAEOA) no Ajénsia Dezenvolvimentu Nasionál, Institutu Públiku (AND,I.P) atu aselera pagamentu ba projetu 53 iha Oekusi no selebra mós termu kontratu ho kompañia sira-ne’ebé ezekuta projetu emerjénsia ho de’it orden serbisu.
Governante ne’e, propoin ho razaun katak, ezekusaun Orsamentu Jerál Estadu (OJE) 2026 nian, husi RAEOA foin mak atinje de’it 10% no ezekusaun FED sei iha 2%. Tanba ne’e nia husu presiza halo pagamentu ba projetu sira nune’e bele hasa’e ezekusaun.
“Tékniku sira sei halo avaliasaun, hodi haree took, maibé ita fó prioridade ba projetu 53, sira-ne’ebé iha ona orsamentu ba tinan ne’e, tenke fó prioridade atu ezekuta osan ne’e, maibé sira-ne’ebé seidauk tama iha planu ita buka atu ajusta ba iha tinan oin liliu hanesan projetu emerjénsia sira, balun iha ona progresu serbisu maibé seidauk halo pagamentu, balun seidauk iha kontratu, entaun tékniku sira, haree sira-ne’ebé seidauk iha kontratu, nia problema saida, atu halo kontratu hodi halo pagamentu liliu projetu emerjénsia sira, nune’e bele hasa’e ezkusaun orsamentu RAEOA nian,” nia hateten ba jornalista iha Gabinete Autoridade Oekusi, sesta horsehik.
Notísia relevante:Prezidente KAFED orienta Autoridade RAEOA hasa’e ezekusaun no prepara planu OJE 2027
Minstru Samuel Marçal, konsidera projetu sira-ne’e povu sente ona, tanba barak área urbana, maibé ida-ne’ebé seidauk hotu, presiza halo pagamentu tuir progresu serbisu, pagamentu uitoan nune’e kompaña bele kontinua ba finalizasaun.
“Ha’u husu foku lai ba projetu ne’ebé tama ona planu tinan ne’e, sira-ne’ebé kontratu mate kuandu halo amandamen tenki iha justifikasaun, tanba tuir lei kompaña mak tenke hatama nia pedidu husu estensaun, depois ita halo justifikasaun, nune’e bainhira halo pagamentu bazeia nia progresu serbisu, maibé kuandu la halo pagamentu, entaun sei afeta ba ezekusaun, agora tama ona trimestre daruak, tenke book aan,” nia fó hanoin.
Notísia relevante:Projetu emerjénsia 22 iha Oekusi suspendidu, hein desizaun Konsellu KAFED
Hatan ba rekomendasaun ne’e, Diretór Serbisu Rejionál Obra públika Oekusi, Remígio Nuno Sila informa katak preokupasaun durante ne’e maka oinsá ezekuta orsamentu fundu kapitál dezenvolvimentu hamutuk millaun $22,230.00, orsamentu ne’e aloka ba projetu 53, husi fundu ne’e grande projetu rua estrada husi Tono ba Oésilo no husi Ponte Noefefan ba Oénunu millaun $15, no aloka ba projetu sira seluk maka millaun $6-resin inklui projetu emerjénsia sira.
“Prosesu pagamentu ba projetu hirak-ne’e afeta tebes tanba ho mudansa estrutura RAEOA entaun to’o oras ne’e, ita seidauk ezekuta fundu ne’e, ne’ebé ami husi serbisu obra públika rejionál prontu serbisu hamutuk ho ekipa Sekretáriadu FED, atu haree ba asuntu projetu sira,” nia hateten.
Tanba dokumentu barak ona liliu ba rekomendasaun husi ADN refere ona mai Obra Públika, entaun presiza de’it ba Autoridade atu finaliza lalais prosesu sira, liliu ba pagamentu inklui kontratu ba projetu balu sei kontinua ho orden serbisu.
Iha fatin hanesan, Diretór ADN, Januario Maia Guterres, klarifika katak husi projetu 53 ne’e balun aloka ona osan iha 2026 ne’e, kuaze kompañia barak mak kontratu mate liliu estrada rurál sira.
“Bazea ba verifikasaun husi ADN presiza estensaun kontratu, sira-ne’ebé hetan ona verifika AND ona, fó impaktu ba kustu totál ne’e, balu sei tuun fila-fali, balu sa’e itoan, tanba nia husu liliu Diretór Sekretáriadu FED presiza halo koordenasaun ho Prezidente Autoridade RAEOA, hodi aprezenta iha reuniaun KAFED tuir mai, atu aprova atu aumenta kontratu hodi kontinua ba prosesu pagamentu,” nia hateten.
Notísia relevante:Reuniaun KAFI iha Oekusi, projetu 30 aprovadu inklui monumentu Lifau
Jornalista: Abílio Elo Nini
Editór: Rafael Ximenes de A. Belo
