DILI, 11 Juñu 2026 (TATOLI)–AD Santo António halo festa golu iha Estádiu Munisipál Dili, kinta kalan, hafoin halakon FC FIEL ho golu 7-0, iha jogu ikus Grupu A Segunda Divizaun Liga Futebol Timor-Leste (LFTL) 2026.
Notísia Relevante: Eduardo Pereira lori AD Santo António hakoi Ponta Leste nia mehi
Ho vitória ne’e, Santo António la’ós de’it sai kampiaun Grupu A, maibé garante ofisialmente billete promosaun ba Primeira Divizaun époka 2027, maske foin mak sa’e husi Terseira Divizaun iha tinan kotuk 2025.
Bainhira jogu hala’o, árbitru Francisco Pereira loke dalan ba jogu ne’e, ekipa rua lansa kedan kontra atake ba malu iha kampu laran, adeptu sira tuur akompaña ho kuidadu.
Jogu la’o manas ne’ebé hamanas ho adeptus atus ba atus nia lian, festa golu hahú kedas iha minutu 26 bainhira Silveiro Garcia sai markadór hodi muda rezultadu ba 1-0.
Jogu sai rame liutan, basá ekipa husi Polísia Nasionál Timor-Leste ne’e la fó tempu ba FIEL atu dada iis tanba Olegar Xavier aumenta kedas golu ba 2-0 iha minutu 30.
Nune’e, antes minutu primeira parte termina, vitória Provizório hela ho 2-0 no Santo António mak lidera jogu.
Tama ba segunda parte, ekipa ne’ebé lidera husi treinadór Eduardo Pereira ne’e hatudu liután nia klase ho materia jogadór ne’ebé brillante. Jogadór FIEL book an la di’ak tanba presaun to’o la iha konsentrasaun jogadór Santo António, Luis Figo konverte penalidade iha minutu 58 hodi muda rezultadu ba 3-0.
Hafoin ne’e, tanba sorte boot monu ba Santo Antonio, mak jogadór Olegar Xavier marka tan nia golu daruak iha minutu 68 no kompleta hat-trick iha minutu 72, hodi muda rezultadu ba 5-0.
La para de’it iha ne’e, Olegar kontinua sai asasinu ba FIEL nia defeza bainhira hatudu jogu ne’ebé di’ak, iha minutu 88, Olegar marka tan golu ida hodi kompleta nia golu ba haat muda rezultadu jogu ba 5-0.
Jogu hetok la’o manas liutan, FIEL laiha tan kbiit atu reziste, Santo António aproveita oportunidade hodi festa golu, mak jogadór Janurio da Silva taka festa golu ne’e ho golu ikus iha minutu 90 hodi haboot nia vitória ho rezultadu ikus 7-0.
Promosaun Istóriku iha Tinan Rua
Vitória ne’e lori Santo António hakerek istória foun iha futeból Timor-Leste. Ekipa ne’ebé foin mak promove husi Terseira Divizaun iha 2025, konsege ultrapasa Segunda Divizaun iha tentativa dahuluk no sa’e kedan ba Primeira Divizaun 2027.
Istória hanesan mós sei marka husi Hibers FC husi Grupu B, ne’ebé mós foin sa’e husi Terseira Divizaun no garante ona promosaun.
Ekipa rua ne’e sei hasoru malu iha Finál Segunda Divizaun iha tempu besik hodi deside kampiaun jerál 2026 ba Segunda Divizaun.
Esforsu ne’ebé klube rua enfrenta konsidera susesu Santo António no Hibers nian hamoe ekipa antigu sira-ne’ebé tinan barak la konsege sa’e ba Primeira Divizaun, hanesan FIEL, Lica-Lica, Nagardjo no seluk tan.
Ekip AD Santo António
Herculano Lopes (12); Jose Oliveira (6), Sandro Quintão (14), Jose Pereira (25), Agostinho Araujo (22); Koyo Kanda (16), Abril de Deus (8); Natalisio Prereira (24), Anizio Boavida (26), Ologar Xavier (18), Adelino de Oliveira (3).
Jogadór Suplente
Lourenço Henrique (20), Palomito Ribeiro (5), Zeferinho Monteiro (19), Silveiro Garcia (27), Uaitilia Amaral (17), Bras de Deus (33), Emmanuel Ghanaian (11), Juvencio Casimiro (10), Januario da Silva (23), Octavio Mesquita (13), Herbonio Lopes (31), Anizio Correia (4).
Ekipa FIEL
João Manise (1), Jenito Freitas (2), Delio Manise (4), Giovanio Freitas (16), Deonisio Lopes (24), Gabriel da Conceição (22), Flavio Ximenes (14), Angelmo Moreira (13), Eidio Manuel (6), João Ximenes (17), Expedito Fuel (11).
Jogadór Suplente
Inacio Tilman (20), Lourenço Ximenes (7), Pedro Rosa (23), Tarsisio Barreto (18), Saveriano Ximenes (26), Hernanio da Conceição (12), Angelmo Coli (25), Anibal da Cunha (15), Sergio Pereira (8), Crisanto Eko (3), Marques Cabral (23), Jose Sarmento (27), Elvis Gomes (19), Ranfim Boavida (5).
Notísia Relevante: Eduardo nia fuan iha “Ponta Leste” maibé mehi atu halakon “Ponta Leste”
Jornalista : Hortêncio Sanchez
Editór : Cancio Ximenes
