OEKUSI, 12 Juñu 2026 (TATOLI) – Komisaun Nasionál Eleisaun (CNE, sigla portugés) hala’o edukasaun sívika iha Autoridade Rejiaun Administrativa Espesiál Oekusi Ambeno (RAEOA) hodi konsolida Partidu Polítiku (ParPol) sira hodi halo preparasaun ho misaun no vizaun polítika atu konkorre iha eleisaun munisipál no desentralizasuan administrativa, ne’ebé tuir planu Governu sei realiza iha 2027.
Prezidente CNE, José Belo, hateten, edukasaun sívika ne’e baze ba lei númeru 22/2021 kona-ba Lei Eleisaun Munisipál (LEM) no lei númeru 23/2021 kona-ba Lei Podér Lokál no Desentralizasaun administrativa (LPL-DA).
“Partidu polítiku hanesan organizasaun permanente, iha estrutura tantu munisipíu no postu administrativu sira, entaun edukasaun sívika ne’e realiza atu hato’o ba sira-nia militante no estrutura, liliu ba preparasaun eleisaun sira mai, tanba 2027 iha eleisaun rua akontese; eleisaun Prezidensiál no posibilidade iha mós eleisaun munisipál ka podér lokál, tanba ne’e, maka importante ba Partidu Polítiku sira atu prepara aan agora,” nia hateten iha salaun edukasaun Oekusi, sesta ohin.
Notísia relevante:CNE, STAE no partidu polítiku hahú halo preparasaun ba eleisaun 2027
Autoridade orgaun eleitorál ne’e esplika, preparasaun saida mak Partidu Polítiku sira prepara-an, maka tenke haree poténsia ba Lei Eleisaun Munisipál sira, atu konfirma kompeténsia saida mak hato’o ba lei sira-ne’e, tanba durante ne’e governasaun la’o ona, maibé podér lokál maka seidauk.
Tenke envolve mós feto potensiál
Entaun bainhira atu entrega polítika ne’e, presiza mós unidade entre Partidu Polítiku sira kona-ba preparasaun, nune’e bainhira simu karik, simu ho di’ak, no unidade nafatin atu tau prioridade Oekusi nian ba oin.
“Ida-ne’e maka objetivu di’ak ba sira (parpol) ho modelu oioin, tanba edukasaun sívika la’ós atu esplika ba rona de’it, maibé partidu sira mós tenke ko’alia, ne’e maka debate entre sira inklui talk-show, livremente, atu ko’alia sai kona-ba sira-nia preparasaun ba futuru eleisaun podér lokál, no promove mós diskusaun ba destinu RAEOA ne’e futuru atu sai oinsá, no mós bele koñese lideransa intelektuál Oekusi ne’e kada partidu, tanba lideransa ba Oekusi la’ós ida rua de’it, maibé tenke envolve mós feto potensiál sira,” nia afirma.
Iha biban ne’e, Prezidente CNE, enkoraja kuadru Partidu Polítiku sira, atu hamoris, konsolida demokrásia, tanba konsolida ne’e signifika hametin buat ne’ebé iha ona, lahatudu buat foun, tanba unidade iha ona no ko’alia bebeik ona ba komunidade sira, maibé entre Partidu Polítiku sira la konsolida malu, “Atoni-oan ida de’it maibé iha partidu ketak-ketak, tanba ne’e maka presiza konsolida ho integridade no respeita malu ona ho instituisaun CNE no STAE ne’e tenke iha integridade, respeitu no fiar malu,” nia fó hanoin.
Notísia relevante:Komisaun A aprezenta alterasaun Lei Eleitorál no Eleisaun Munisipál
Koordenadór Partidu KHUNTO Oekusi, Martinho do Nascimento Obe, apresia no konsidera programa edukasaun sívika ne’e prioridade tanba kria espasu públiku atu prepara líder munisipál sira atu prepara aan ba futuru, prepara mós vizaun no misaun oinsá bele uza iha futuru asembleia munisipál, bele iha ona programa polítiku klaru tuir kontextu Oekusi nian.
“Ha’u apresia no agradese ba parte CNE, husu atu kontinua realiza nafatin, nune’e kaderizasaun ba lideransa la’ós hela de’it iha estrutura nível komisaun polítika rejionál maibé fahe mós oportunidade ba feto potensiál sira, juventude no klibur intelektuál profisionál sira, ne’ebé espasu públiku ne’e tenke kontinua loke no edukasaun sívika tenke kontinua realiza ba parte hotu, liliu iha kuadru polítiku sira to’o militante no apoiante sira iha baze,” nia hato’o.
Notísia relevante:Xanana husu Oekusi-oan hanoin ho reflesaun kle’an simu Governu Lokál iha 2027
Entretantu, observasaun jornalista Ajénsia Tatoli,I.P, nota durante programa edukasaun sívika realiza iha Oekusi hetan partisipasaun másima husi kuadru Partidu Polítiku sira ne’ebé hetan asentu iha Parlamentu Nasionál (PN), hanesan CNRT, FRETILIN, PD KHUNTO no PLP.
Nune’e iha programa edukasaun sívika ne’e, CNE promove mós diskusaun aberta husu no hatan, inklui kria debate públiku entre Partidu Polítiku sira ho tema ‘Estratéjia partidu polítiku ba poder lokál no dezentralizasaun administrativa’ inklui hala’o talk-show ba partidu sira-ne’ebé hetan asentu iha Parlamentu Nasionál.
Notísia relevante:CNE sosializa eleisaun munisipál ba partidu polítiku sira iha Vikeke
Jornalista: Abílio Elo Nini
Editór: Rafael Ximenes de A. Belo
