OEKUSI, 18 Juñu 2026 (TATOLI) – Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, husu PNTL no FALINTIL-Forsa Defeza Timor-Leste (F-FDTL) iha Rejiaun Administrativa Espesiál Oekusi Ambeno (RAEOA), atu serbisu hamutuk hodi serbí povu ho dignidade no labele uza fali violénsia ka uza “liman no ain kamaan” hasoru komunidade sira.
Komisáriu Afonso dos Santos, hato’o nia apelu ne’e, hafoin hala’o vizita ofisiál dahuluk nu’udar komandante jerál iha komandu PNTL Rejiaun Administrativa Espesiál Oekusi Ambeno (RAEOA), kinta ohin. Orientasaun ne’e bazeia mós ba Artigu 147.º husi Konstituisaun RDTL, ne’ebé stipula katak Polísia sei defende legalidade demokrátiku no garante sidadaun sira-nia seguransa internu (…), hodi foti aas mós prinsipál prosimidade nian ne’ebé hakerek ona iha Lei Orgánika PNTL (Decreto-lei N.º 55 /2022) .
“PNTL, Forsa Defeza, Forsa Navál, atu serbí ita-nia povu ida-ne’e ho dignidade laiha liman no ain kama’an ba ita-nia povu , orientasaun ida-ne’e ha’u hato’o, tanba ita-nia Jenerál Maun Falur Rate La’ek, ko’alia ona ho ha’u, katak militár ho polísia serbisu ida de’it, kolabora malu ida-ne’e maka loos, tanba ita ukun aan ida-ne’e husi povu,” nia hateten hafoin vizita komandu PNTL Oekusi, ohin.
Notísia relevante:Lidera PNTL Oekusi, Komandante Nicolau prioriza asuntu haat ho akumulativu
Autoridade másima instituisaun PNTL ne’e espera, atu nafatin profisionalidade nu’udar instituisaun seguransa nasaun nian iha povu nia leet, atu garante seguransa ba povu ho domin.
“Ha’u husu Forsa Defeza iha Oekusi iha navál ho Terrestre nune’e mós komandante PNTL. Ha’u husu ba imi serbisu hamutuk fó liman ba malu haree ita-nia povu sala karik, tuir prosesu ne’ebé legál, la’ós ain, liman kama’an ba povu. Se ida-ne’e akontese, ha’u husu ba ita-boot sira, imi nia fatin iha ne’e laiha, sei muda imi ba fronteira no fatin seluktan, atu ita-boot sira aprende, ita husi povu no sei fila povu, husu hadomi no serbí nafatin ita-nia povu,” nia hateten.
Serbisu hamutuk no Kooperasaun ho Komunidade
Iha biban ne’e, Autoridade Polisiál ne’e, rekomenda mós entidade sira iha Oekusi, hanesan veteranu, relijioza no Konsellu-Suku atu serbisu hamutuk no tau matan ba lala’ok serbisu seguransa sira iha Oekusi.
“Ha’u husu veteranu sira tomak, igreja husi padre no madre sira, Konsellu-Suku sira, atu haree ita-nia alin sira, ita rai ne’e ema hotu ko’alia veteranu, ita sai ezemplu ba povu, nune’e mós husu atu tau matan mós ba forsa defeza no polísia, serbisu laloos relata ba komandante sira, maibé ha’u husu ba imi atu fó apoia malu nafatin ita bele haburas ita-nia rai ho situasaun hakmatek ba futuru, kolabora malu,” nia afirma.
Notísia relevante:Komandante Jerál Afonso dos Santos fó pose ba ofisiál superiór PNTL na’in -13
Sekretáriu Rejionál ba Asuntu Administrasaun no Finansa, Salvador da Cruz, reprezenta Prezidente Autoridade RAEOA, sente orgullu ba vizita ne’e, tanba bele hametin liután ita koordenasaun entre instituisaun seguransa ho Governu iha Oekusi.
“Tanba durante ne’e PNTL apoia maka’as kona-ba seguransa liliu ba eventu Governu nian, ami espera ho vizita ne’e bele hametin liután ita-nia liña koordenasaun, tanba durante ne’e mós sempre hamutuk tanba Oekusi, nu’udar rai-ketan, entaun presiza unidade atu garante situasaun hakmatek,” nia hateten.
Seguransa koletiva iha liña fronteira
Iha fatin hanesan, Komandante PNTL Oekusi, Superentendente Xefe Polísia, Nicolau Francelino da Costa, hato’o agredesimente tanba bele vizita komandu PNTL Oekusi atu haree kondisaun no situasaun reál iha Oekusi.
Nia hateten, nu’udar komandu munisípiu durante ne’e la hala’o serbisu mesak, maibé sempre koordenasaun ho forsa destakadu sira, hanesan UPF (Unidade Polísia Fronteira), UPM (Unidade Polísia Marítima), (Batallaun Orden Púlika (BOP), Serbisu Migrasaun, Forsa Defeza, no komandu PNTL mós hetan apoia fonte informasaun husi Serbisu Nasionál Intelejénsia no J2, no mós komandu PNTL iha koordenasaun orizontál ho Autoridade RAEOA inklui igreja no Konsellu-Suku 20 iha Oekusi.
“Serbisu hamutuk ida-ne’e ho intensaun atu prevene krime la’ós husi komandu PNTL maibé serbisu koletiva, ida-ne’e mak sai hanesan save ba susesu tomak iha komandou PNTL Oekusi, liliu iha liña fronteira, komesa husi Sakato to’o Citrana, no liña koordenasaun vertikál ho komandante destakadu sira hodi asegura liña fronteira atu hakmatek no seguru, no povu fó konfiansa nafatin ba seguransa,” nia hateten.
Entretantu, deklarasaun ne’e tuir mós mandatu Artigu 146.º husi Konstituisaun kona-ba defeza nasionál.
Jornalista: Abílio Elo Nini
Editór: Rafael Ximenes de A. Belo
