LIKISÁ, 19 Juñu 2026 (TATOLI) — Prezidente Institutu Nasionál Kombate HIV/SIDA (INCSIDA-Sigla Portugés), Daniel Marçal, husu ba joventude Munisípiu Likisá atu hadook-an husi relasaun seksuál ne’ebé la seguru, tanba hahalok ne’e bele aumenta risku ba transmisaun HIV no afeta sira-nia futuru.
Prezidente INCSIDA hato’o apelu ne’e durante kampaña nasionál sensibilizasaun no informasaun kona-ba prevensaun HIV/SIDA iha Unidade Sentru Formasaun Juventude, Suku Maumeta, Likisá Vila, Sexta.
Tuir nia, relasaun seksuál ne’ebé la seguru kontinua sai fator importante ida ne’ebé kontribui ba transmisaun HIV.
Daniel relata katak tuir dadus grupu idade entre 15 to’o 24 mak populasaun ne’ebé vulnerável liu hetan moras ne’e.
“Joven sira mak futuru nasaun, nune’e presiza proteje-an hodi foka ba edukasaun no dezenvolvimentu,” nia dehan.
Nia hato’o katak INCSIDA halo ona koordenasaun ho Ministériu Edukasaun atu integra edukasaun seksuál iha kurríkulu nasionál atu eduka estudante sira kona-ba saúde seksuál no reprodutiva, nune’e bele toma desizaun responsavel iha moris lorloron.
Koordenadór Unidade Sentru Juventude Likisá, Eduardo dos Santos Gonçalves, agradese ba INCSIDA tanba organiza atividade sensibilizasaun ne’e no fó informasaun importante ba joventude sira iha munisípiu Likisá.
“Lori joventude Likisá nia naran, ami hato’o agradese ba Prezidente INCSIDA no ekipa ne’ebé mai fahe informasaun kona-ba prevensaun HIV/SIDA. Ami espera katak koñesimentu ne’ebé hetan ohin bele ajuda joventude sira hadook-an husi hahalok risku no prevene-an husi moras ne’e,” dehan Eduardo.
Nia husu ba INCSIDA atu kontinua realiza programa sensibilizasaun iha fatin seluk, atu komunidade no joventude sira bele asesu informasaun kona-ba prevensaun HIV/SIDA.
Enkuantu, reprezentante joventude Likisá, Celina Soares de Fátima dehan atividade sensibilizasaun ne’e importante tebes ba joventude sira atu komprende risku HIV no oinsá atu prevene moras ne’e. “Informasaun ne’ebé ami simu sei fahe fali ba joventude seluk ne’ebé la konsege partisipa. Ida-ne’e importante atu sira mos bele hatene kona-ba hahalok risku no forma prevensaun HIV/SIDA,” hateten Celina.
Jornalista: Camilio de Sousa
Editór: Filomeno Martins
