DILI, 20 Juñu 2026 (TATOLI)–Diretór Ezekutivu Arkivu Rezisténsia Timorense (AMRT), Jorge Alves ‘Wemoris’, informa, projetu konstrusaun Jardín Chama Eterna kuaze ramata nune’e tuir planu sei inaugura iha tinan ne’e.
“Konstrusaun Jardín Chama Eterna agora tama ona iha faze ramata. Tuir planu AMRT sei inaugura iha loron 28 Novembru atu fó glória no onra ba eroi sira hotu ne’ebé sakrifika sira-nia an ba independénsia rai ida-ne’e,” Wemoris hato’o ba Ajénsia TATOLI, iha AMRT, Sábadu ne’e.
Projetu ne’e daudaun atinje ona 90%, hein konklui ho parte balun iha li’ur hanesan reboka.
Nia subliña, Jardín Chama Eterna sei sai hanesan monumentu nasionál ida atu fó onra no perpétua ba memória funu-na’in no mártir sira-ne’ebé sakrifika sira-nia moris ba independénsia Timor-Leste.
Notísia relevante : Dokumentu istóriku balun sei muda ba Jardín Chama Eterna
Nune’e, tuir planu sei husu atu apoiu husi Forsa Defeza Timor-Leste (F-FDTL) atu garante seguransa no prezervasaun Jardín Chama Eterna hafoin inaugurasaun.
Medida rai ba konstrusaun ne’e purvolta metru 2.000-resin kuadradu ho kustu ba konstrusaun fízika $4.000.000-resin, inklui kustu ba unidade projetu jestaun no kustu ba supervizaun $5.000.000-resin.
Konstrusaun dura fulan-30, hahú Fevereiru 2023 to’o Setembru 2025 husi empreza Starking no MDF Acesso iha Joint Venture. Supervizaun ba projetu maka konsórsiu Soares no Guterres.
Maibé iha kestaun balun hanesan bainhira ke’e rai hodi konstrui mosu bee ne’ebé nunka maran entaun iha difikuldade atu aselera no ikus kontinua to’o ohin loron bele atinje ona 90%.
Jornalista : Osória Marques
Editora : Julia Chatarina
