BAUKAU, 24 Juñu 2026 (TATOLI)—Autoridade Munisipál Baukau (AMB) sei realiza misa requiem ba Maktoban Francisco Guterres ‘Lú Olo’ nu’udár rekoñesimentu ba dedikasaun durante asume pasta nu’udár eis titulár iha Timor-Leste.
Prezidente Autoridade Munisipiu Baukau, Veneranda Lemos, esplika Autoridade Munisipál deside selebra misa requiem ba Maktoban Lú Olo liuhusi reuniaun Konsellu Konsultivu Munisipál (KKM) nu’udár parte hatudu respeitu no fó omenajen ba maktoban ne’ebé durante moris kontribui másimu ba nasaun.
“Ita organiza misa solenidade ba saudozu nia falesimentu, tamba ema barak sei labele to’o iha Dili atu fó nia ultimu omenajen ba saudozu,” Prezidente Autoridade Munisipál Baukau hateten iha Salaun Apuramentu Administrasaun Vila Nova, Baukau, Kuarta ne’e.
Eis deputada ne’e relata Autoridade Baukau liuhusi reuniaun KKM deside realiza misa tanba atu fasilita komunidade iha Baukau hodi hato’o sentida kondolénsia no fó omenajen ikus ba Saudozu Antigu Prezidente Repúblika Lú Olo iha-ne’ebé razaun distánsia no limitasaun transporte hodi difikulta povu barak iha Baukau sei la konsege bá Dili atu vizita saudozu nia kadáver no partisipa diretamente iha prosesu funerál ikus.
Aleinde ne’e, liuhusi misa requiem sai momentu ida ba komunidade, autoridade no parseiru dezenvolvimentu sira atu hamutuk fó omenajen ba Saudozu Lú Olo, ne’ebé durante nia moris kontribui ba luta libertasaun no dezenvolvimentu nasaun Timor-Leste.
“Ita sei aviza ba membru konselhu hotu katak misa ba saudozu eroi boot Eis Prezidente Asembleia Konstituinte nia falesimentu aban sei organiza,” Veneranda Lemos akresenta.
Tuir planu, Maktoban Eis Prezidente Asembleia Konstituinte, Eis Prezidente Parlamentu Nasionál, Francisco Guterres Lú Olo sei haloot iha Jardín Eroi Metinaru, Dili, 26 Juñu 2026.
Entretantu, eis gerrilleiru ne’e hakotu-iis iha 21 Juñu 2026 bainhira hala’o tratamentu saúde iha ospitál Prince Court, Kuala Lumpur, Malázia.
Jornalista: Natalino Belo
Editór: Xisto Freitas da Piedade
