DILI, 24 Juñu 2026 (TATOLI)–Eldino Nobre Guterres nu’udár oan daruak hosi maun-alin na’in-haat, haktuir mensajen Saudozu Antigu Prezidente Repúblika, Francisco Guterres Lú Olo bainhira sei moris sempre motiva nia oan sira tenke sai hanesan batar saren ne’ebé hakruuk tun ba kraik kuandu batar ne’e isin ona.
“Mensajen ne’ebé pai sei moris fó ba ami, ha’u pesoál konsidera hotu, maibé iha liafuan ida ne’ebé impresiona tebes ne’ebé sei grava metin iha ha’u-nia ulun laran to’o agora. Iha tinan tolu liubá iha Portugál bainhira halo jantár pekena ida ho família, pai dehan mai ha’u, bá eskola buka matenek, hasa’e O nia koñesimentu, filafali mai ho O nia matenek, sai hanesan batar saren ne’ebé kuandu batar ne’e isin ona sempre hakruuk tun ba rai no la sa’e ba leten,” Eldino Nobre Guterres dehan ba TATOLI, iha Rezidénsia Faról, Kuarta ne’e.
Nia hatutan saudozu sempre fó korajen no dedika ba oan sira atubele valoriza no prioriza sira-nia edukasaun.
“Tanba edukasaun ba pai ne’e importante dezde ami sei ki’ikoan. Edukasaun hahú uma laran mak sai ba to’o li’ur. Bainhira Pai sei moris sempre husu tuir ami-nia eskola no evolusaun kada eskola nian. Ne’ebé, pai sempre tau edukasaun sai fatór esensiál,” Eldino haktuir.
Tanba, Saudozu Lú Olo nia karakter hanesan ema simples no ema baibain no sempre pasa tempu barak liu haree nia ai-horis sira no paixaun boot mak múzika, no mós buka hatene kona-ba nia estudu sira, maibé hirak-ne’e ne’e hotu sai istória no memória ba oan sira hodi konta tuir, tanba rezultadu konsulta iha Ospitál Prince Court, Kuala Lumpur, Malázia la konsege salva nia vida.
“Ami sempre update informasaun kona-ba pai nia rezultadu konsulta. Loron kalan sempre halo kontaktu. Maibé, relativamente konsulta ida-ne’e nia karakter diferente ho konsulta anteriór sira, ne’ebé pai bá halo tratamentu iha Malázia, fulan tolu (3) sempre halo check up, maibé konsulta ida agora ne’e relativamente diferente uitoan,” nia haktuir.
Hosi ne’e, Eldino informa, oan sira deside tenke fila bá Malázia hodi kontinua akompaña tratamentu, maibé infelizmente rona novidade triste.
“Bainhira rona pai moras ona, doutór sira halo kontaktu ho família entaun ami deside halo viajen sedu. Ha’u bainhira rona informasaun dehan pai laiha ona ne’e sei iha aviaun laran,” Nobre dehan.
Husu kona-ba kontinua valoriza maktoban nia kontribuisaun, nia hatán, forma ida atu valoriza ida-ne’e mak kontinua halo estudu to’o nivel ne’ebé nia bele halo no matenek ne’ebé iha hodi filamai serbí ba rain rasik. La’ós forma valoriza de’it ba saudozu maibé mós ba nia maluk sira ne’ebé luta ba rai ida-ne’e durante tinan 24.
Maski nune’e, Eldino tenik, saudozu laiha ona maibé sira nafatin iha korajen hodi kontinua sira-nia prosesu aprendizajen iha idaidak nia estudu.
“Prosesu estudu ha’u-nian la’o normál, más diferente mak falta ona kontaktu no laiha diskusaun ka fahe ideia ho pai,” nia hateten.
Iha biban ne’e, nia mós hato’o mensajen murak: “Hanesan povu baibain, ami-nia hakarak mak rai ida-ne’e ukun-na’in sira bele ukun rai ne’e ho di’ak, serbí rai ne’e ho fuan ho laran hodi valoriza mós eroi sira tanba sira ho fuan ho laran mak liberta rai ida-ne’e”.
Jornalista: Osória Marques
Editór: Xisto Freitas da Piedade
