DILI, 26 Juñu 2026 (TATOLI) – Kadáver eis-Prezidenti Repúblika, Francisco Guterres “Lú Olo”, ohin, tuku 09:42 simu ho onra militár, iha Palásiu Prezidensiál, Dili, iha ne’ebé Xefe Estadu, José Ramos-Horta, hamutuk ho funsionáriu sira fó omenajen ikus.
Bainhira karru funeráriu to’o iha Palásiu Prezidensiál, kadáver “Lú Olo” simu ho onra militár husi FALINTIL-Forsa Defeza Timor-Leste (F-FDTL), Polísia Nasionál Timor-Leste no ekipa Seguransa Prezidensiál.
Prezidente da Repúblika tun husi eskada boot Palásiu Prezidensiál no la’o ba kareta funeráriu hodi halo kontinénsia ikus ba Francisco Guterres “Lú Olo”. Hafoin ne’e Ramos-Horta lidera minutu silénsiu hodi hanoin fila-fali matebian nia kontribuisaun durante luta ba ukun-an no iha prosesu harii Estadu Timor-Leste. Ikus liu, Prezidente Repúblika besik fila-fali ba kaixaun hodi fó despedida ikus ho respeitu no emosuan boot.
Iha despedida ikus ne’e, Joaquim da Silva Guterres, funsionáriu Departamentu Média no Komunikasaun Prezidénsia Repúblika ne’ebé servisu hamutuk ho “Lú Olo” durante nia mandatu husi tinan 2017 to’o 2022, deskreve matebian nu’udar ema ida ne’ebé ho karakter “kalma, pasiénsia no simples”.
“‘Lú Olo’ ema ida ne’ebé kalma, pasiénsia, la ko’alia aat ema seluk no moris ho simplisidade. Nia iha fuan boot ba nia povu. Ha’u bele ko’alia nune’e, tanba ha’u rasik akompaña Prezidenti ba munisípiu sira. Bainhira hasoru malu ho komunidade, nia sempre besik ho povu, rona sira nia preokupasaun ho kalma no nunka hirus,” hatete Joaquim da Silva Guterres ba Tatoli, Sesta ne’e.
Joaquim da Silva Guterres mós hanoin fila-fali katak durante tinan lima iha Palásiu Prezidensiál, “Lú Olo” sempre fó motivasaun ba funsionáriu sira atu halo servisu ho profisionalizmu. “Nia dehan ba ami katak hanesan funsionáriu públiku ami tenke halo ami nia knaar ho di’ak no asegura agenda Prezidente da Repúblika lao tuir planu. Nia sempre dehan mai ami katak asuntu polítika ne’e responsabilidade partidu sira, maibé funsionáriu Estadu tenke servisu ba nasaun ho responsabilidade no integridade,” nia dehan.
Funsionáriu ne’e mós konta katak iha mandatu ikus “Lú Olo” nian, iha tinan 2022, nia simu medalha kondekorasaun husi Prezidenti hanesan rekoñesimentu ba nia servisu.
“Bainhira simu kondekorasaun ne’e, ha’u tanis. Momentu ida-ne’e sei hela nafatin iha ha’u nia hanoin. ‘Lú Olo’ ema ida ne’ebé iha fuan boot, hadomi nia funsionáriu sira, hadomi povu no labarik sira. Ami sei hanoin nafatin nia-buat di’ak sira no dalan ne’ebé nia-trata ema hotu ho respeitu,” hatete tan.
Iha areadores Palásiu Presidensiál, la’os de’it funsionáriu, maibé marka prezensa mós husi estudante sira husi eskola oioin no komunidade barak ne’ebé hamriik iha dalan ninin hodi fó despedida ikus ba líder ida ne’ebé dedika nia-moris ba luta libertasaun no dezenvolvimentu nasaun nian.
Vizita ba Palásiu Prezidensiál integra iha programa ofisiál serimónia funerál Estadu nian hodi rekoñese servisu no kontribuisaun Francisco Guterres “Lú Olo” bainhira kaer knaar hanesan Prezidente da Repúblika entre 2017 no 2022.
Notísia relevante: Omenajen ikus iha Kuartél Jerál F-FDTL, Lú Olo nunka trai povu nia konfiansa
Jornalista: Afonso do Rosário
Editora: Isaura Lemos de Deus
